Panda CLICK!: Angkun ngintu rampa menua asal

KAPIT: Peranak Song enggau Baleh diatu ngembuan peluang bekunsi jerita nengah gambar pengudah mujur nembuka latih fotografi Panda Click.

Panda Click diatur Wang Turu Jelu Siga Menua Sedunya (WWF)- Malaysia tu sebengkah inisiatif baru ngambika peranak Kapit ngemeratka agi rampa menua enggau main asal kitai.

Program tu dipejalaika sebaka enggau WWF-Indonesia di Kalimantan Barat, program entara garis menua tu disukung Projek Inisiatif Gaya Hari Entarabansa dalam Kandang Tengah Menua Borneo (HoB).

Program dipejalai 10 bulan pengelama digulu 19 penyereta mujur meri asil urung 20,000 kepin gambar berambaika rampa menua, penau asal, pengawa besehari sehari, adat enggau main asal sereta infrastruktur dikembuan peranak menua tu.

Bala penyereta mega diberi latih nusui jerita ngagai mensia mayuh nitihka gambar ti diambi sida.

UKAI MUDAH… Penyereta Panda CLICK! sabar nganti kemayang ikan baung dikena ngulihka gambar ti pemadu manah.

Pengawa nutup program latih udah diatur di Kompleks Nengeri Bletih di Kapit dikena meri tabi basa ngagai bala penyereta volunteer ti ransing ngambi gambar.

Dua iku penyereta, Peter Jabat enggau Usik Reba, udah dipadu bulih gelar Tukang Gambar Pemadu Nyulut ungkup kategori lelaki enggau indu.

Pemesai Pelilih Bukit Mabong Douglas Pungga udah dipebasa bejadika pengawa nya seraya meri pengaga ati ngagai semua penyereta laban gambar ti diasilka sebaka enggau gambar jurugambar professional.

Pengari penyereta Panda Click, Peter ti mega Tuai Rumah di Ulu Katibas, ngarapka program tu ulih ditampung ngambi mayuh agi rayat ulih nyaga rampa menua, kelebih agi di menua tu.

“Aku mega ngarapka sida ti nyereta aktiviti Panda Click tu deka seruran begulai nyaga rampa menua kitai ngambika kampung enggau jelu ulih likun dijaga. Enti kitai enda nyaga (rampa menua) diatu, jelu kitai deka punas,” ku iya.

Sama datai ngulu pengawa nya, Pemesai Pelilih Song Jackline August sereta bala bukai.

Koleksyen gambar ti diambi deka diangkat nyadi sebuah bup lalu dibantaika ba sebengkah pengawa mandang fotografi ti deka diatur di Kalimantan Barat enggau Kuching dalam taun tu.

CHUKUP LANDIK… Dipeda besai, Seiku reriga mesai tunjuk jari mensia tu dipeda besai nengah Teknik fotografi mikro.

 

GAYA IDUP… Penyereta Panda CLICK! Mujur nangkap chara peranak Ulu Katibas mindah (ngena jalai ai) ari siti endur ngagai endur ke bukai.