Pangka BCA meri pemaik ngagai komuniti

“Ari Sempekat Bekunsi Untung (BCA) tu, komuniti deka bulih hak ngagai asil biologi enggau penemu tradisional.”

KUCHING: Pangka Sempekat Bekunsi Untung (BCA) deka nyendiaka peluang sosio-ekonomi alternatif ti nambah penatai pemisi komuniti.

Chairman Kaunsil Biodiversiti Sarawak (SBC), Tan Sri Datuk Amar Wilson Baya Dandot madah tu seriris enggau peneka perintah nengeri deka betukar ari industri tradisional lalu meda ngagai asil penumbuh ekonomi alternatif ti baru nengah sains enggau teknologi.

“Ari Sempekat Bekunsi Untung (BCA) tu, komuniti deka bulih hak ngagai asil biologi enggau penemu tradisional.
“Penguntung ti diulih ari sempekat tu deka diperati ari sukut belanja enggau ukai belanja lebih agi dalam chara ngena asil biologi enggau penemu tradisional,” ku iya.

Iya madah munyi nya lebuh pengawa betukar Sempekat Bekunsi Untung (BCA) entara Palan Biodiversiti Sarawak (SBC) enggau Lima Bengkah Komuniti Asal di Palan Biodiversiti Sarawak (SBC) Puncak Borneo, kemari.

Kelimpah ari nya, nengah sempekat bekunsi untung enggau bala komuniti, tu tanda ti manah ngagai pemisi genetik enggau penemu tradisional sereta ngena biodiversiti enggau meruan.

“Sarawak nyadi nengeri keterubah ti bejalaika atur baru tu nengah Sempekat Bekunsi Untung (BCA).
“Tu meh peluang Sarawak meda trajektori bioekonomi nengah program biodiscovery baka ke dipejalaika sida SBC,” ku Wilson.

Ba sempekat tu, SBC bekunsi untung dalam asil ti datai ari pun ke dikumbai Pahkak tauka nama saintifik iya Litsea cubeba lalu naka ke diatu, sida SBC enggau Lima Bengkah Komuniti Asal bisi tujuh bengkah produk dipansut ari pun nya.

Berebak enggau nya, Wilson ngarapka sida SBC ulih ngaga lima agi bengkah produk ari asil pun Pahkak.

Lima bengkah komuniti ti bisi enggau dalam sempekat tu iya nya komuniti Lun Bawang ari Long Telingan, Lawas, komuniti Lun Bawang ari Long Kerebangan, Lawas, komuniti Kampung Kiding, Padawan, komuniti Kelabit ari Pa’Lungan, Bario sereta komuniti Kelabit ari Pa’Ukat, Bario.

KETUAI KOMUNITI… Wilson begulai enggau bala ketuai komuniti ari bansa Lun Bawang, Kelabit enggau Bidayuh.