Pantang bekenarau ukai reti jai ulah

Pantang ke mayuh bekenarau ba tubuh sesiku orang suah dikaitka enggau ulah enda manah baka ketuai bayat tauka raban ke bukai.

Tang, mayuh enda nemu, sentang reta pantang ke mayuh motif ukir tu.

Ba siku orang ke landik ngaga pantang, Ernesto Kalum Umpia, 48 taun madah sekumbang 25 taun udah ngerandang dunya pantang, kebendar pantang tu kelai bujang berani lalu bisi motif tradisonal baka bungai terung.

Bungai terung tu iya nya pantang Iban keterubah diukir ba tubuh siku orang Iban kelia lalu meri reti ke chukup besai.

Tu mega ngelai pengering orang nya bejalai, kelimpah mandangka pengeransing ngidupka diri lalu ngajar sida baka ni napi pemedis pengidup,” ku iya.

BUNGAI TERUNG…Enesto bisi ngembuan pantang bungai terung ba kededua piak bau.

Ernesto madah, ukir bungai terung mega mandangka ubah ba jeman anak mit ngagai besai tuai.
“Kelimpah nya, iya mega nyadi kelai penuai runding pungka lelaki Iban,” ku iya.

Nerang silik, iya madah pantang bungai terung tu digaga ba kededua piak bagu lalu nunga ke mua betuju nyaga pengelikun sesiku orang lalu nyeliah sida ari nasib ke enda manah.

Iya siku orang ke bisi muka kedai pantang diberi nama “Borneo headhunter” ba Jalai Wayang Kuching madah, pantang ke digaga iya udah jauh ngerembai bisi dipeda ingap ba tubuh peranak menua bukai nyengkaum Singapura, Eropah, Amerika Syarikat, Kanada, Switzerland enggau Jipun.

Tu mandangka pantang ke ditempa ditu mujur diangkat ngagai tikas ke tinggi iya nya ngerembai dunya luar ari Sarawak.

“Pantang asal bisi penyelai laban ngembuan reti kediri empu. Nya alai semua ukir aku meseti ngetanka reti asal nya.

“Anang enda ingat pantang asal tu digaga ngena kayu enggau jarum aja iya nya main tatuk,” ku iya.

Taja pia, Enesto kekadang nitih singkang jeman moden begunaka perengka baru ke digaga ari England ba pengawa ngaga pantang nitihka peminta penguna.

Pantang ukai semina diayan ba bidang fesyen tang mega nyau nyadi pemaik tauka pengawa dikerindu bala nembiak rebak baru lebih agi pantang moden.

PANTANG ASAL…Chara ngaga pantang asal semina begunaka kayu enggau jarum aja iya nya main tatuk.

Suara Sarawak