KANADA: Ketegal deka ngembuan gamal baka siku raban BTS, Jimin, siku pelakun peranak menua Kanada midang pengudah ngaga 12 pengawa beputung plastik.
Saint Von Colluci, 22, midang ba sebuah sepital ba Korea Selatan ketegal beputung ngeluarka implan ari rang ti digaga iya berapa bulan sebedau nya.
Berita bekaul pemidang pelakun nya dikenuku ejen publisiti, Eric Blake lalu Colluci udah ngena belanja $220,000 (RM979,110) bejalaika pengawa beputung plastik ngambi ngembuan gamal baka raban Kpop nya.
“Pekara tu endang chukup ngenyinuka ati taja pen Collucci nemu empas ari pengawa beputung tu tang iya tetap deka ngereja pengawa tu.
“Colluci nadai ngembuan pengandal ati ngagai diri empu sereta enda rindu meda gaya rang diri ti besai lalu iya deka ngembuan langkar rang ‘V’ baka orang Asia,” ku Black.
Black madah, Colluci udah ngaga 12 pengawa beputung ba taun nyin kemari nyengkaum beputung rang, idung, implan, ngaga mulut mit, ngangkatka mua, idung sereta mata enggau ti bukai.
