LAWAS: Perintah Sarawak merambu bejalaika pengawa ngemansangka baru Pasar Trusan berenggat nengah Program Ngemaru Kandang Mengeri ngambi ulih nempa siti pasar ti moden, manah enggau maju agi.
Sapit Premier Sarawak, Datuk Amar Awang Tengah Ali Hasan madah, pengawa bejalaika projek Jalai Besai Menua Pesisir Utara (NCH) deka meri empas ngagai sekeda bansal ti udah bisi dia lalu pedagang bekaul ti diau sementara ba palan nya udah dikelala ngambi sida ulih seruran bedagang dia.
Ku iya, Kaunsil Pelilih Lawas deka nyeruri perengkaguna pemun nyengkaum jalai tama ngagai palan pengentap pendiau sementara nentuka pengelantang bala pedagang.
“Bansal bejual ti kena renchah projek NCH deka dipindah kitu ngambi sida ulih bedagang baka selama seraya nganti projek dipejalai,” ku iya.
Awang Tengah bejaku munyi nya lebuh ngabas palan pengentap pendiau sementara ungkup pedagang di Pasar Trusan, Hari Minggu tu tadi.
Ku iya, perintah udah ngemendarka pelin pemansang baru Pasar Trusan ti nyerangkung mayuh komponen dikena ngeranchak aktiviti ekonomi menua.
Sekeda perambu pemansang ti deka dipejalai nyengkaum numbuh opis pelilih mit, rumah kedai, tamu ninting minggu, stesyen minyak, palan entepan perengka pengangkut besai enggau perengkaguna bukai ti engkeman ungkup guna komuniti dia.
Iya madah, sitak di seberai Pasar Trusan mega deka terus dikemansang, nyengkaum nyendia rumah, palan lumba sereta engka nirika kuarters orang gawa perintah nitih ke peminta kemaya hari tu.
Ku iya, perambu nya ngembuan tuju nentuka Pasar Trusan nyadi palan ti berurun agi ungkup aktiviti dagang enggau servis, sereta nyungkak tikas ekonomi enggau pengelantang pendiau peranak dia. – EDISI UKAS
