KUCHING: Opis Kampung Sarawak enggau piak bekaul ke bukai dipinta beratika kompeni kereja batang ti bisi lisin ngereja kayu nangika sida nebang kayu kandang kampung kenu bungkur Pulau Galau enggau Pemakai Menua (PMPG).

Presiden Sarawak Workers Party (SWP) Munan Laja madah, kayu ba menua tu majak kurang laban seruran ditebang kenyau ari 30 tauka 50 taun ke udah.

“Kami SWP endang mantah sereta mejah pengawa betebangka kayu sebelah kandang PMPG.

“Tu endang salah ari sukut undang-undang kelimpah balat bendar ngeruga pengidup orang asal tauka orang ke ngempu menua,” ku iya madah nengah penerang berita, tadi.

Ku Munan, PMPG tu endang meruan adat enggau undang-undang kediri empu ti nyadika lalau peranak asal ti ngemeranka iya.

Iya madahka kompeni kereja batang patut sereta enda tau enda nemu bagi endur ke tau dikereja nitihka lisin sida.

“Nadai ngira nama bansa kayu tang seagi-agi dalam kandang PMPG endang enda tau ditebang.

“Kayu ba kampung nya semina ulih diambi sereta dikena orang ke beempu menua aja,” ku iya madah nyemetak.