BINTANGOR: Sapit Menteri ba Opis Premier Sarawak (Unit Pekara Korporat, Pemadah enggau UKAS), Datuk Abdullah Saidol ngelalau sambung tali karan patut semampai dipatau ba rumah panjai kelebih agi rumah panjai lama.
Ku iya, pengawa nya beguna amat dikena nyeliah penusah sut tali karan ti nyadi sebengkah ari pun penusah angus ba rumah panjai.
Iya nyemetak madah, pekara nya meseti dikemerat laban penusah angus ba rumah panjai enda sebaka enggau rumah bansa bukai ti ulih ngujung ke peranak bebadi nyawa enggau napi pengerugi besai.
“Penusah tu ulih diseliah enti sistem sambung karan diadu manah lalu aku minta ejensi bekaul kelebih agi SESCO ngatur program ngambi meresa sambung karan ba ninting rumah panjai kelebih agi kandang menua ti jauh ari akses bomba,” ku iya lebuh dirandau pengudah nyuaka bantu ngagai sida ti tasah angus ba Rumah James Brandah, Muara Bunut, ditu tadi.
ADUN Semop nya mega ngelalau perintah nyendia kereban pengerara api ba genap pintu rumah panjai.
