KUCHING: Komiti Besai Pengawa Bepilih (SPR) ti mandangka perambu ngadu baru entara sitak bepilih kena nambah 17 penuduk DUN Sarawak dipeda semina dikena ngerindang ati rayat.
Menteri Dagang Temuai, Industri Kreatif enggau Seni Pemerindang, Datuk Seri Abdul Karim Rahman Hamzah madah, kebuah pia laban pengawa nya baka nadai reti enti penuduk baru nya enda ulih dikena ba Pengawa Bepilih Besai Nengeri (PRN) ti deka datai.
Ku iya, pengawa nya patut udah digaga tumu agi, lebuh mosyen nambah 17 penuduk nya dikemendar DUN Sarawak lebih ari setaun ti udah.
“Pengawa tu patut digaga tumu agi, laban pengawa nambah penuduk bisi atur ti meseti dititihka sebedau perambu nya ulih diteruska.
“Utai ti nyadi tanya diatu, kati timpuh ti agi tinggal ari Ogos nyentuk Februari 2027 chukup kena nembuka semua atur ti ditetap nitih undang-undang, ngambika penuduk baru nya ulih dikena ba PRN ti deka datai,” ku iya.
Abdul Karim madah munyi nya ba aum media beserimbai enggau Ekspo Umrah Sarawak enggau Pesta Dagang Temuai Islam ba Begunan Baitulmakmur II ditu, kemari.
Iya madah, pengawa mandangka perambu nya ngambi timpuh dua nyentukka tiga bulan, sebarang penyangkal ti diterima meseti diperesa silik sebedau perambu nya dibai ngagai Parlimen kena ngulihka pemendar enggau rasmi.
“Enti SPR dikemendar enda ibuh nitihka Akta Pengawa Bepilih ti bisi dalam Konstitusyen, engka 17 penuduk nya ulih dikena ba PRN sekali tu.
Tang, kitai bisi undang-undang kitai empu ti meseti dititihka.
“Nya alai, ba penemu aku, pengawa tu semina ngerindang ati rayat Sarawak, tang ba pengujung iya, penambah 17 penuduk nya enda ulih dikamatka,” ku iya.
Taja pia, Abdul Karim ngaku pengawa ti diatur SPR nya udah mandangka SPR berengkah ngereja pekara nya, tang iya agi kakang ati kati semua 17 penuduk baru nya ulih diperebutka ba PRN ti deka datai.
Ba pekara ti sama, iya madah pengawa nambah penuduk DUN amat diguna ba Sarawak, laban bisi sekeda kandang DUN ti pemesai iya deka sebaka enggau siti nengeri ba Semenanjung.
“Penambah penuduk DUN deka ngemudahka rayat mansutka penanggul ba kandang menua sida.
Iya mega meri awak ngagai ADUN ngintu rayat enggau lebih meruan, lalu enda ibuh bejalai nganti 10 tauka 14 jam kena datai betemu enggau rayat ba kandang menua ti diintu sida.
“Pengawa nambah penuduk tu nadai ngembuan tuju bukai ti dilalaika.
Batang tuju iya semina ngambika pengawa ngintu rayat ulih digaga enggau lebih manah sereta meri asil,” ku iya.
Ba timpuh ke baru tu, SPR mega udah nyuaka peminta ngagai Opis Bekuasa Menua (PBT) kena mandangka perambu mansik baru garis entara sitak DUN Sarawak, nitihka penambah 17 penuduk ti udah dikemendar.
Perambu nya deka dipandangka ba opis kunsil mengeri, opis pelilih menua enggau opis pelilih ba 31 kandang Parlimen ba serata Sarawak.
