PENYAKIT begedi ke pangan diri ba kitai bansa endang udah tebantai kenyau ari kelia. Taja pekara nya enda berapa manah dikenang tang penyakit nya diperati agi bisi dipurih sekeda rebak baru kemaya hari lalu ngujungka bansa kitai tusah amat deka begempung beserakup enggau pangan diri ba sesebengkah organisasyen tauka leman pengidup.
Bukti penyakit kepapas tu kala inggap ba kitai bansa lebih agi lebuh diau ba rumah panjai iya nya nengah kenang Pantu Kepapas ti ditengkebang niang Dungging anak Gunggu tauka kedua bali nama iya dikanggau Seragunting. Siku penengkebang sistem sepil jaku Iban urung taun 1947 asal ari menua Debak, Saribas.
Dalam rangkap keterubah Pantun Kepapas nya Dungging bisi ngerintaika leka pantun munyi tu ; “Kelebawan kitai Iban ti runding enda ulih diubah, Merinsa kitai Dayak ti perangai baka kai udah, Begulai di rumah panjai ati enda manah, Begedi meda pemisi orang bilik sebelah, Puas ati kepapas dilah selalu nyumpah, Mulut seneka nyebut liur selalu beludah, Ati balat bedengki ngagai diri serumah, Ngembuan ati ensiban atau balut kamah.”
Nitihka sagam penemu siku belayan Dungging empu, Prof Madya Dr Bromeley Philip ke mega nyadi pengelicha di UiTM Kota Samarahan madahka reti rangkap keterubah dalam pantun kepapas tu nya ngenang ulah Iban di rumah panjai bisi kepapas meda pemisi, reta sereta pemujur siku-siku.
Kenu ku iya, enti sepintu nya bisi kebun sawit tauka lada besai, lalu bisi ga bala bukai enda nyamai ati meda sepintu nya nyulut ngembuan kebun besai laban ti ngembuan ati kepapas, mayuh sida nya enggai betanya sereta belajarka chara ngereja numbuhka kebun sawit tauka lada.
Nangkan nya, ku iya enti sepintu mayuh anak mujur sekula bulih pelajar tikas tinggi lalu enda nyamai ati orang bukai meda pengidup sida sepintu nyamai ari orang bukai, sida ti ulih begagaka bilik ngena perengka chukup enggau ulih meli entukar hilux lalu pengidup dipeda nyamai.
“Sepintu ti nyulut ari bala bukai nya seruran diajihka tuntung penusah laban ati jai rindu meda orang tinggang penusah, bulih pemedis lalu idup merinsa,” ku iya nerang nengah sebengkah randau enggau siku penulis Ruai, Suara Sarawak sebedau tu.
Nyadi baka nya mih sebagi ari gaya ‘paung’ kepapas’ ke patut dipunas. Paung kepapas tu enti majak diibun iya ulih ngasuh kitai majak dikemaruh sereta diketawa. Jeman diatu jeman kitai mesti berubah awakka kitai bansa bela teulihka pemujur enggau pemansang dalam pengidup kelimpah dikemegah ba semua bidang.
Munyi ku lalau niang Benedict Sandin dalam bup Singalang Burong ke dikarang iya nengah cherita ‘Pindah’ ba genteran kepenudi dia iya mesan kitai Iban ke sama pun penatai enggau pemindah endang patut amat beserakup begempung enggau pangan diri.
Kenu ku iya ; “Nyadi samoa Iban nya tadi endang diri sama diri magang. Sida iya datai ari siti pun lalu adat ke dipegai sida sama sabaka enggau adat ke dikingat ka diri sama diri.”
Nya alai, ari ajar orang tuai kelia enggau ke diatu nadai kebuah kitai kepapas ke bansa diri nyema meda pangan diri teulihka penyamai enggau pemujur. Pekara ke patut digaga kitai iya nya neladan lalu meransang diri enggau kaban belayan kitai awakka sama nyingkang nitihka pemujur sida ke udah dulu nyulut.
Ari nya, baru pengidup kitai deka angkat lalu dipebasaka semua orang baik nya diri semenua tauka bansa bukai. Berengkah ari diatu, kitai enda tauka enda ngajar diri sebilik nyema penyakit kepapas agi bisi inggap ba runding diri empu enggau diri sebilik nyadi besampi mih awakka paung penyakit nya tau tingkil, punas, lepas, lelang, midang lalu badu agi ngachau ngeregau pengidup kitai bansa. Ohaaa…
