SIBU: Parti Pesaka Bumiputera Bersatu (PBB) Pampang Bawang Assan madah sida deka nempa kerejasama enggau Parti Seati Rayat Sarawak (SUPP) lebuh Pengawa Bepilih Nengeri (PRN) ila.
Ku Tuai Pampang, Romeo Christopher Tegong, sida nyukung SUPP laban sitak Kunsil Nengeri (DUN) Bawang Assan endang dipenggi SUPP.
“Kami (PBB) di Bawang Assan enggai ngilikka agi ‘perau’ Gempung Parti Sarawak (GPS) ti ujung iya ngerugika kitai empu. Penuduk Bawang Assan endang dipenggi SUPP.
“PBB Pampang Bawang Assan sehari tu ngeletak pemutus baka ti dilalau Premier Sarawak, ti mega Yang di-Pertua PBB (Datuk Patinggi Tan Sri Abang Johari Tun Openg), nempa kerejasama enggau SUPP ngambi ngetan penduduk DUN N53 Bawang Assan ti dipenggi SUPP,” ku iya ba aum pemberita pengudah Aum Besai Setaun Sekali (AGM) Pampang Bawang Assan ditu sehari tu.
Ngelama tu, ku iya, penuduk DUN Bawang Assan nyadi penuduk SUPP, lalu udah nyadi prinsip GPS nempa kerejasama enggau sapa-sapa aja ti nyadi chalun SUPP-GPS.
Ku Romeo, sida enggai ila nyadi penusah ti tau ngerugi ke diri empu baka undi pechah ti tau ngasuh penuduk nya dipegai baru ulih penyakal.
“PBB nyadi tulang belakang GPS di nengeri tu. Kitai bisi urung 3,724 kaban ba sitak Bawang Assan.
“Aku minta semua pampang indu enggau nembiak bekereja sama lalu bebendar gawa ngambi chalun GPS ulih menang.
“Kitai meseti gawa bendar sekali tu laban sitak Bawang Assan udah jauh tinggal ari sukut pemansang, baka projek transformasyen menua pesisir (RTP), rumah panjai repuk, infrastruktur enggau perengka guna,” ku iya.
Romeo madah, tuju AGM sehari tu ngambi nyikap semua pampang ti bisi 12 pampang mit enggau dua pampang mit ‘protem’ dikena napi PRN ila.
Ku iya, PRN ulih nyadi ba taun 2025 tauka 2026 munyi ku disebut Premier sebedau tu.
