SIBU: Gerempung Anak Bulan Mirah Malaysia (PBSMM) Pampang Sibu diatu ulih nyendia servis ambulans ti manah agi pengudah nerima ambulans baru.
Ungkup penerang, ambulans baru nya diberi Gerija Jesus Christ of Latter-day Saint (LDS) Malaysia.
Chairman PBSMM Pampang Sibu, Penghulu Chua Hiong Kee madah, naka diatu, sida agi bisi ngembuan sebuah ambulans lama.
Iya madah, nengah bantu ambulans ari LDS nya enggau sebuah agi ti deka diterima sida ba bulan Februari tu ila, sida bisi tiga ambulans.
“Kami ulih mantu ngelempung tating Sepital Sibu ba pekara bekaul servis ambulans laban ambulans kami udah nambah.
“Kami nanggam kerejasama pintar enggau Sepital Sibu ba pengawa mantu nyendia servis ambulans ti diguna rayat,” ku iya.
Mandal Chairman PBSMM Pampang Sibu, Dr Rachel Teng madah, pampang nya begunaka mayuh agi ambulans laban mayuh peminta ungkup servis ambulans dikena mai pesakit ke sepital.
“Lebuh bisi penusah ngenyit, kami begunaka ambulans lalu nengah bantu tu, kami ulih ngesan pangku pengawa diri chakah agi mantu sepital nganjung raban tasah aksiden berubat ke sepital,” ku iya ti mega Sapit Direktor Sepital Sibu.
Volunteer LDS Malaysia, Elder Sandy Hall madahka sida beterima kasih laban ulih mantu PBSMM Pampang Sibu nengah bantu ambulans nya.
“Kami udah diau ba Malaysia pengelama 17 bulan lalu tu kedua kali kami meri bantu ambulans. Kami meda sida (penerima) begunaka ambulans, nya alai, kami meri bantu tu,” ku iya.
Gerija nya, ku iya, bela mantu Sepital Sibu ngemanahka agi infrastruktur sida nyengkaum meri bantu sebaka ngagai sebuah sekula ba Lundu.
