KUCHING: Polis DiRaja Malaysia (PDRM) Kontinjen Sarawak nerima 69 entukar baru bansa Perodua Aruz SUV 1.5X dikena nyilih Proton Preve ti udah abis timpuh suwa.
Pengawa nyerah enggau nerima renggat kedua nya mungkur empat opis Indu Opis Polis Kontinjen (IPK) Sarawak enggau 24 Indu Opis Polis Pelilih (IPD).
Kepala Polis Sarawak, Datuk Mancha Ata madah, pengawa nyilih entukar ungkup opis enggau IPD nya dikeandal ulih ngangkat nama manah PDRM.
Pia mega, ku iya, nya deka mantu ngelancharka agi pangku pengawa polis.
“Aku ngarap entukar tu dikena enggau manah bejalaika pangku pengawa ba opis enggau pelilih diri empu,” ku iya.
Mancha mansutka jaku nya rambau Pengawa Nyerah Entukar Tim Suwa Konsesi SPANCO ti bepalan ba Balai Tebuka, IPK Sarawak ditu, kemari.
Iya madah, pengawa nyerah reta entukar baru nya dikena ngamat juluk perintah bekaul pengawa ngena entukar baru deka mantu nambah produktiviti pegawai enggau raban polis.
Nya mega, ku iya, beguna amat ba pengawa meri servis pemadu manah ngagai komuniti kelimpah nyaga pengelikun enggau pengelantang dalam nengeri kelebih agi ba Kontinjen Sarawak.
