KUALA LUMPUR: Bank enggau institusyen wang Malaysia meseti nyendia atur muntang agi nentu mayuh agi pemain industri nyengkaum dagang mit enggau jelan pemesai (PKS) ulih ngasai pemaik wang nya.
Premier Sarawak, Datuk Patinggi Tan Sri Abang Johari Tun Openg madah, pekara nya beguna amat dikena nyukung pemansang ekonomi menua sereta meri pemaik ngagai rayat berindik ari gaya ekonomi ti berubah deka meri empas besai ngagai pemain industri PKS sereta serikat mit enggau jelan pemesai ba menua tu.
“Kebuah pia laban dagang tu tulang belakang ekonomi menua laban sida ngaul ba aktiviti rentayan bekal enggau ngemansang industri,” ku iya.
Abang Johari mansutka jaku nya ba Aum Besai Pekara Bank enggau Wang Malaysia di Intercontinental Kuala Lumpur, ditu kemari.
Dikena nyendia peluang tu ku Abang Johari, Sarawak udah ngelanjar subsidi bungai ungkup tiga chara belanja di baruh Bank Negara Malaysia (BNM) dikena mantu PKS napi ekonomi kusut lebuh pandemik COVID-19.
Ku iya, Sarawak aja nengeri ba Malaysia ngelanjar subsidi bungai ungkup PKS laban sida nya penyungkak ekonomi Sarawak manggai 50 peratus pedagang di menua tu.
“Penyampau bajet ungkup subsidi bungai ba Bantu Khas (SRF), Bantu enggau Tuju Penyuman (TRRF) sereta Pemansut Belanja Dagang Temuai (PTF) nya urung RM80.7 juta lalu Perintah Sarawak udah nyendia subsidi bungai pengelama tiga taun setengah.
“Bisi 1,918 PKS Sarawak udah bulih pemaik ari skim tu enggau penyampau jali RM560.67 juta lalu subsidi dipelaba penyampau RM47 juta,” terang iya.






