Pedas besaup mantu Rumah Dingun

SIBU: Serakup Dayak Sarawak (Pedas) Pampang Sibu enggau Mukah pagi tadi besaup nganjung bantu ngagai peranak Rumah Dingun Megong ba Skim Sekuau ke tasah karam di darat.

Pejalai sida sebuat betubuh 20 iku diuluka Ketuai Pampang Pedas Sibu, Mathew Mudai enggau Ketuai Pampang Pedas Mukah, Membuas udah mupuk tumu pagi ngena tujuh buah entukar ti ngundan barang bantu.

“Baka selama lebuh bisi penusah ngenyit baka tu nya, kami dulu bekunsi penerang ti betul ari piak ulih dikearap lalu betesau sebelah ruai WhatsApp serakup nyengkaum ruai Indu Opis (HQ) Pedas di Miri.

“Semua pemutus datai ari penemu bala mayuh lalu kami di Sibu enggau Mukah dilempaika pengandal ngesah kin seraya ngenataika jaku peransang ngagai sida Dingun serumah.

“Sapa enda sinu meda sida serumah lenyau reta tengkira enggau rumah tekala nya. Nya alai kitai mega besampika sida tu liat ati napi penguji besai ke nuntung,” ku iya lebuh dirandau Suara Sarawak tadi.

Mathew madah, entara bantu bisi dianjung sida baka gari enggau bantu mata duit ti udah disua ngagai Tuai Rumah Dingun empu ngarika sida serumah ba Palan Ngenduh Orang Tasah ba endur diau enda lama ba Dewan Serbaguna Sekuau.

Ungkup penerang, rumah panjai 22 pintu bilik ba Skim Pengentap Baru Sekuau di Kilometer 45, Jalai Oya ditu, angus lengis urung pukul 3.26 dini hari, 9 Februari nyin tadi.

Suara Sarawak