Endang udah pengidup kitai Iban ari suba nyentuk diatu, belelang ngiga pemandai enggau kereja ngambi bulih pengidup menyana dudi hari.
Nya alai, serak tu Suara Sarawak bekunsika landang kenang Sekretari Serakup Anak Borneo Semenanjung iya nya Serit Banyan bekaul enggau peneleba iya sekumbang gawa di menua Semenanjung Malaysia.
Diatu Serit gawa nyadi pengelicha enggau strim kordinator ba School of Liberal Arts and Sciences kelimpah deka bekunsika aktiviti ti kala dipejalai Serakup Anak Borneo Semenanjung.
Ku Serit, mayuh kenang manis enggau pait sekumbang ngiga jereki ba menua orang.
“Pengudah abis belajar suba, sigi pedis ngiga kereja tang lebuh nya aku enda milih kereja, asal bisi kereja enggau begaji aja dikena ngidupka diri ba menua orang.
“Aku mega kala nyadi pelayan tauka waiter ba hotel, bejualka barang ba palan besai bebelika barang sereta kala gawa nyadi promoter.
“Aku berengkah ngelala dunya akademik pengudah gawa nyadi Research Assistant ba Universiti Putra Malaysia (UPM) ari taun 2009 ngagai 2011.
“Dua taun udah nya iya nya 2011, aku bulih pangku pengawa nyadi pengelicha ba Taylors University.
“Belabuh ari nya, aku keran deka ngemansangka diri dalam dunya akademik nyentuk diatu.
“Kebuah pia laban pekara pelajar nya kunchi nempa mayuh agi pemujur dudi hari,” ku Serit ngepunka sebagi ari lansa kenang iya.
Peranak asal Rumah Panjai Nanga Linsom, Ulu Layar, Betong tu madahka iya udah 10 taun gawa ba Semenanjung Malaysia.
Ku Serit, sekumbang 10 taun gawa ba Malaya, mayuh kenang pait enggau manis udah diasaika tang semua nya mujur ditapi nyadika teladan tauka pengering napi pemar ba pengidup.
“Sigi baka baru ngidupka diri ba menua orang, naka ulih nitihka singkang bala bukai lalu belubah beratika gaya pengidup ba Semenanjung suba.
“Lebuh terubah iya datai ba Semenanjung, pedis amat deka nelebaka diri enggau pengidup di Semenanjung suba laban enda kala pansut ari menua Sarawak.
“Tang nasib amat ga bisi bala Iban ke dulu agi belajar ba UPM suba, sida mih ke mayuh nulung lebuh maya tusah.
“Entara pemar diau ba Semenanjung iya nya nyema bisi penusah nyadi ba menua baka penusah rabat ke alai kami enda ulih mulaika kediri maya pandemik tu.
“Nyadi, kami duai bini aku bisi tiga iku anak iya nya Isaac Darius Seminai beumur tujuh taun, Ivan Daryl Rentap beumur enam taun enggau Isaiah Damien Bayang beumur tiga taun.
“Bini aku, Emilia Sinda Dunstan mega bansa Iban asal ari Rantau Dilang, Kanowit. Diatu iya gawa nyadi staf nurse ba Institut Kanser Negara.
“Kami menyanak diatu mega udah ngentapka pendiau diri ba Nilai, Negeri Sembilan sereta udah meli tiga buah rumah ba Semenanjung Malaysia,” ku Serit.
MANTU ANAK SARAWAK NENGAH NGO
Ngelansa pasal gerempung ukai perintah (NGO) ke udah ditumbuh iya nya Serakup Anak Borneo Semenanjung, Serit madahka serakup nya udah mujur ngatur bemacham inisiatif dikena mantu anak Sarawak ke diau di Semenanjung Malaysia.
Nangkan ke nya, Serit ti mega kaban komiti enggau pedagang ba Pasar Borneo Seri Kembangan, Selangor madahka diri suah nyereta pengawa numbuhka Gerempung Ukai Dikuasa Perintah (NGO) Sarawak ba Semenanjung Malaysia.
Terang iya, serakup nya mega dikena ngerembaika budaya enggau main asal Sarawak sereta nyaup orang Sarawak ke tusah.
“Entara aktiviti ke kala diatur kami iya nya Pengerami Nutup Hawaii Kaamatan 2019 Renggat Semenanjung Malaysia, bantu pengasih baka nyuaka bantu pemakai maya pandemik ngagai peranak Borneo di Semenanjung sereta bantu pengasih meli larung enggau tanah pendam.
“Kami mega kala bekerejasama enggau Malaysia Airline (MAS), mai pulai orang Sarawak ti tepekul ba Semenanjung Malaysia ketegal pandemik enggau nganjung bantu ungkup sida ke putus pengawa ketegal pandemik.
“Kami mega kala nyuaka bantu ungkup peranak Sarawak ti sakit raya ba Semenanjung, bengkel ngaga ngepan asal Iban, Eksibisyen Main Asal Borneo di Kuala Lumpur enggau Kelas Tanda Asal Iban,” ku Serit ngelansa pasal aktiviti ke kala diatur serakup sida.
Ba lansa bukai, sebedau tu Suara Sarawak kala mantaika berita pasal pemujur Serit ti nerima bemacham anugerah bekaul inovasyen lebuh ngajar nembiak ba palan pelajar tinggi.
Serit mega kala nerima anugerah ba tikas entarabansa enggau mujur ngubah modul Hubungan Etnik ari belajar ba kelas ngagai belajar nengah online lebuh nempa chara baru.
Berebak enggau nya, Serit mega udah dichiri nyadi komiti besai ba Opis Menteri Pelajar Tinggi ungkup empat tanggung pengawa.
Nya alai, pemujur sereta pejalai Serit bejalai ngagai menua orang ngiga pemandai patut nyadi teladan ngagai semua kelebih agi rebak biak.
Ari cherita ti dikunsi pasal pemujur dijapai Serit tu, mai reti semua kitai mesti ransing enggau liat ati nyapai pemujur tauka juluk ati kitai.
