SIMANGGANG: Residen Bagi Menua Sri Aman, Mahra Salleh mujur ngatur pejalai ngabas seraya gawa ngagai taba Projek Jalai Besai Kedua (STR) Sarawak Pakej B2 Renggat Keterubah di Mengeri Simanggang ngambi ngabas pejalai projek sereta pekara ti nyadi ngelingi endur nya.
Pejalai ngabas seraya gawa ti belabuh ba pelaman Hotel Seri Simanggang nya dikena berati ke pejalai projek kelimpah berati ke tikas pemeresi enggau gaya jalai ti udah dikemanah raban kunteriktor.
Mahra begulai enggau raban iya ngepun pejalai matau ba simpang jalai tama nuju dijir lot kedai besemak sebedau nampung pejalai ngabas ke Jalai Foochow, Pasar Tamu Simanggang enggau endur bukai ti dibungkur pejalai projek nya.
Ku iya, Projek STR Sarawak Pakej B2 Fasa 1 nya inisiatif beguna nambah pengelantang enggau pengelikun penguna jalai alun sereta nyukung pemansang Mengeri Simanggang.
“Taja projek tu agi dipejalai, raban kontraktor meseti terus nentuka pengawa ngemanah dipejalai nitih spesifikasyen ti ditetap.
“Aku mega ngarap sukut pemeresi enggau atur taba semampai diperati ke pengelantang peranak dia sereta pemanah Mengeri Simanggang,” ku iya.
Ku iya, kerejasama rat entara kontraktor, ejensi pengatur enggau raban bekaul bukai beguna amat nentuka sebarang isu ti nyadi ulih diputar lengkas lalu nyeliah peragam negatif ba komuniti.
Bela datai, Sapit Residen Bagi Menua Sri Aman, Frank Lani, Pegawai Tadbir Opis Pelilih Sri Aman, Joshua Martin Jantan, Temenggong Kueh Aik Seng sereta pengari ejensi perintah bekaul. – EDISI UKAS
