MIRI: Pejalai Projek Sistem Solar+Hidrogen ngambi nyendiaka bekal kuasa ngagai komuniti di Long Bedian deka nyadi projek keterubah di Sarawak enggau Malaysia.
Kaban Kunsil Nengeri (ADUN) Telang Usan, Datuk Dennis Ngau madah, perambu pejalai projek nya udah dikerandau enggau Opis Menteri Pemansang Menua Pesisir enggau Wilayah (KKDW), Opis Menteri Utiliti enggau Telekomunikasyen (MUT), Sarawak Energy Berhad (SEB), SEDC Energy Sdn Bhd, Universiti Malaysia Sarawak (UNIMAS) enggau H2 Energy serimbai pejalai ngabas taba Stesyen Hibrid Long Bedian, empai lama.
“Projek ti diperambu nya keterubah ba Malaysia lalu diterima manah sereta seraris enggau juluk Premier Sarawak, Datuk Patinggi Tan Sri Abang Johari Tun Openg dikena ngemansang hidrogen gadung.
“Tu mega ngerintaika fokus perintah nangkup peminta komuniti menua pesisir baka ba genturung pendiau, klinik pengerai, sekula enggau rentayan telekomunikasyen,” ku iya.
Iya madah, projek nya diperambu berindik ari pemujur projek pemungkal solar+hidrogen di Klinik Long Loyang di Ulu Tinjar ti dipejalai H2 Energy nitihka data ti dikenuku ari sistem H2E (H2E1) di Klinik Long Loyang.
