Pekit Kumang Gawai GRP 2019, 25 Mei

PAKAN: Gerempung Raban Pakan (GRP) nesau peranak menua tu nganjung manuk sabung sida ba Pekit Kumang Gawai 2019.

Ku Kaban Komiti Pekara Indu GRP ke mega Komiti Pengatur Pekit, Josephine Grunan, ngena basa ti besai sida nibarka jaku tesau ngagai semua indu dara di kandang menua nya nyereta Pekit Kumang Gawai kena 25 Mei 2019.

Pekit Kumang Gawai tu diatur beserimbai enggau Pengerami Mantar Gawai Dayak 2019 GRP berambaika jaku ‘Serakup Nuju Pemansang’.

“Pekit tu deka diatur ba Balai Komuniti Pakan urung pukul 6.30 lemai ti nerima pemekit ari menua Pakan, Bayong, Julau enggau Sarikei, beumur 18 ngagai 28 taun.

“Bala pemekit enda tau enda bansa Dayak tauka penakan tang ngena nama Dayak lalu sida ti kala menggi gelar kumang enda diterima.

“Maya pekit tu, semina ngepan Iban aja dikemendar sereta tau ngena kasut tebal enggau tunjik,” ku iya nerang.

Nangkan nya ku Josephine, tama pekit nadai bebayar lalu bala pemekit semina ngisi pom penyereta dikena nerangka penempa diri pasal pelajar, batang pengawa, pengangkun enggau pekara bukai ti bekaul.

“Bala pemekit mega nadai bedalih enti dipinta datai raptai kena pagi 25 Mei 2019, urung pukul 9.30 pagi,” ku iya madah nyemetak.

Ku Josephine, taun tu raban pengatur nyendiaka perais manah amat ungkup bala pemenang.

“Gelar Kumang deka nerima perais mata duit RM1,000 disempulang selampai, jumping, trofi, gempung bungai, hamper enggau setipikit.

“Lumur dua tauka Gelar Lulong pulai ngemai RM800 disempulang trofi, hamper enggau setipikit seraya Gelar Selinggar Matahari nerima RM600, trofi, hamper enggau setipikit.

“Perais sagu ati RM200 enggau hamper mega bisi disedia,” ku iya nerang silik.

Pengatur pekit natak 10 ngagai 12 iku penyereta aja lalu hari bulan kepenudi nganjung pom kena 21 Mei tauka Hari Dua deka datai tu.

Penerang enggau tanya silik pasal pekit tauka pekara bukai tau telefon nuju Josephine Grunan ba lumur 0145926388 enggau Lo Teck Hua (0105443704).

Suara Sarawak