KUCHING: Kontinjen Sarawak nguasa penuh pekit nyumpit pengudah mujur ngempu lima midul emas ba pekit kepenudi nyumpit di Padang D, Stadium Nengeri ditu, kemari.
Tuai tim, Lahan Suhaili madah, penyulut nya asil ari gempung latih meruan enggau penyikap runding bala atlit. Iya madah, kebuah pia laban lumba tradisonal nya begunaka pemintar dikena nyaga pengering jari enggau chara enseput ti betul.
“Semekih ari Kalimantan Timur (Kaltim) chukup besai laban kededua tim nya sebela ari sukut pengering tulang. “Taja pia, kami andal pengawa nyikap ti agresif sekali ke nya ari sukut runding enggau fizikal.
“Pengawa nyumpit tu nguna pengering jari enggau pengelanchar seput, enti kurang belatih endang enda ulih menang,” ku iya lebuh dirandau media ditu, kemari.
Tim tuai rumah majak mandang penyulut ba mua penyukung sida taja pen napi semekih besai ari tim Kaltim. Tampung Lahan, iya ngarap pekit nyumpit nya terus nyadi sebagi ari Lumba Borneo dudi hari.
“Aku ngarap pekit tu ulih ditampung baru ba Lumba Borneo dudi hari lalu anang muai pekit nyumpit tu,” ku iya nyemetak.
Penyulut nyapu beresi emas nya negap penuduk Sarawak nyadi kuasa besai ba pekit nyumpit di rantau Borneo sereta nyadi peransang ngagai kontinjen nengeri. – EDISI UKAS
