SYLVESTER RIANG
Suarasarawak.news@gmail.com
KUCHING: Pekit Pickleball SEDC 2025 ti diatur Kaunsil Pemansang Ekonomi Sarawak (SEDC) nerima timbal ti chukup ngemantupka ati.
Pekit nya empai lama mujur dipasuk 132 tim betipak (berpasangan) ti mungkur 124 tim betipak ngaul kategori beregu indu, beregu lelaki, beregu veteran enggau beregu begulai.
Nangkan nya, lapan tim betipak ti bukai bepekit ungkup kategori VIP ti ngaul bala temuai dipebasa enggau temuai ti dikangau khas.
Dikena ngerichahka agi pekit nya, SEDC bela nyendia perais mata duit sepenyampau RM10,800, midul enggau trofi ungkup bala pemenang.
Chairman SEDC, Tan Sri Datuk Amar Abdul Aziz Husain nyemetak madah, pekit nya beguna amat dikena narak gaya idup bepengerai enggau ngedut pemanah kaul.
“Pekit tu mega majak dikerindu ke mensia mayuh sereta meransang sida aktif ba pengawa lumba.
“Pemujur ngatur pekit tu mandangka pengeransing SEDC ngelakuka gaya idup bepengerai, meransang komuniti enggau pemegai taruh ngaul pengawa lumba sereta nyukung pemansang lumba pickleball di Malaysia,” ku iya.
Iya andal pekit nya enda ngetu naka nya aja tang deka ngerandang ngagai edisyen pengudah nya dudi hari.
Pekit nya diatur SEDC nengah kerejasama kelab rekreasyen SEDC iya nya PEDAS lalu disukung bakih strategik, The Podium Project enggau Gerempung Pickleball Kuching.
