BALAI RINGIN: Bisi 20 iti papan burak interaktif mujur diberi ngagai sekula di sitak Balai Ringin.
Sapit Menteri Dagang Temuai, Industri Kreatif enggau Seni Pemerindang ti mega Kaban Kaunsil (ADUN) Balai Ringin, Datuk Snowdan Lawan madah, inisiatif nya nyadi sebagi ari pengawa negap pelajar digital.
Iya madah, inisiatif nya mega dikena ngedut takah teknologi entara sekula menua pesisir enggau mengeri.
“Dikena nambah kualiti pengawa ngajar enggau belajar (PdP) enggau chara ti interaktif agi bepelasarka teknologi, sekula menua pesisir mega patut bulih akses perengkaguna teknologi ti sebaka ba mengeri.
“Kebuah pia ngambi bala nembiak di menua pesisir enda tinggal ari landskap pelajar ti majak maju.
“Pelajar entara pekara ti balat dikemerat aku. Nya alai, aku deka genap anak mit di sitak tu bulih peluang belajar ti pemadu manah enda ngira tirai juru sida sebilik,” ku iya.
Snowdan bejaku munyi nya rambau program nyuaka inisiatif nya ba DEPO Balai Ringin kena Hari Tiga tu tadi.
Iya madah, nya ukai pemeri iya ti keterubah ngagai sekula di sitak Balai Ringin laban sebedau tu sekeda sekula ba sitak nya bela nerima televisyen pintar ungkup guna ba bilik kelas ungkup dikena nyukung pengawa PdP ba sekula.
Ku iya, Sekula Primari (SK) Pantu mujur dipilih nyadi palan ngatur program robotik ungkup meri pengeleda tumu ngagai nembiak ba bidang Sains, Teknologi, Injiniring enggau Matematik (STEM).
