BETONG: Pelajar ba renggat sekula primari meseti terus ditegap dikena nempa rebak ti sedia nangkup peminta ekonomi baru Sarawak kelebih agi ba bidang ekonomi hidrogen, ekonomi digital enggau industri ili ti begunaka pengereja landik.
Kaban Parlimen Betong, Datuk Dr Richard Rapu madah, pengawa nguasa pengelandik macha, nulis enggau ngitung (3M) barenggat tumu nya beguna endar sebedau nembiak diajar bidang Sains, Teknologi, Injiniring enggau Matematik (STEM) ti nyadi penyungkak pemansang nengeri dudi hari.
“Pelajar ba renggat sekula primari nya pemun nempa modal mensia.
“Pengawa nguasa pengelandik macha, nulis enggau ngitung (3M) meseti diansah kenyau ari biak dikena besikap nempa rebak ti ulih nguasa bidang Sains, Teknologi, Injiniring enggau Matematik (STEM), nipak peminta ekonomi baru Sarawak,” ku iya.
Richard madah munyi nya lebuh bejadi Pengerami Merarau Ngiling Tikai Gawai Dayak Sekula Primari (SK) St. John 2026 ti diatur Gerempung Apai Indai enggau Pengajar (PIBG) sekula nya di Dewan Sukan Tan Sri Datuk Amar Stephen Kalong Ningkan, ditu ensanus.
Ku Richard, pemansang ekonomi baru Sarawak baka ekonomi hidrogen, ekonomi digital enggau industri ili begunaka pengereja ti bisi penemu sereta pengelandik ba bidang STEM, nya kebuah pengerindu ba bidang nya meseti ditarak kenyau ari biak.
Iya madah ke sekula primari enggau sekondari mangku pengawa besai nempa pengawa belajar sereta ngansah pengulih nembiak ngambi sida sedia napi pemar dunya kereja dudi hari.
Nambah ke nya, iya ngansak raban sekula terus ngemerat penyulut akademik lalu enda nejuka pemansang pemanah ulah enggau aktiviti kokurikulum.
Iya mega nyemetak madah ke pemujur pelajar ukai semina bepanggai ba raban sekula aja, tang mega begunaka sukung ari apai indai, PIBG enggau komuniti menua.
Ba pengerami nya, Richard ti datai ngari ke Sapit Premier Sarawak ti mega Kaban Kunsil Nengeri (ADUN) Bukit Saban, Datuk Amar Douglas Uggah Embas mega ngemendar agih belanja RM5,000 ngagai PIBG SK St. John dikena nyukung atur program sekula, ngemanah fasiliti belajar sereta nangkup peminta nembiak. – EDISI UKAS
