PEMANAH sereta penyelai mengeri Kuching ti ngempung elemen moden, klasik enggau besejarah udah tentu deka narit ati semua temuai ti datai raun ngagai mengeri tu nyengkaum siku bujang sigat asal ari Tambunan, Sabah.

Taja pia, bisi siti pekara ti balat ngasuh iya tebelenga nyau bepurus dada, ngasuh kedap iya deras enda badu keketap sereta ngasuh mata iya lekat baka ti udah kena jayau seribu guna.

Pemajik siku dara ti benung begambar di Tebing Sungai Kuching ngasuh iya labuh pengerindu keterubah meda Kumang Sarawak nya.

Ukai semina bajik, dara nya ngembuan raras tubuh ti rumpas nyau baka gita, liuk tubuh ayun lundai baka tiun lagu romantik lalu kulit iya burak lis baka tenun kain sutera.

Mua iya tampak mancharka tuchum manis penuh adat basa lalu bekena ke ngepan indu Iban nambah ke pemajik chukup menyana.

Baka nya ku penteba siku dara bajik ti disadaka Elterbeth Empah tauka Elter Bronstein, 22, nengah lagu iya ti pejuluk Kumang Sarawak.

Lagu romantik nya mujur dikeluarka nengah pelasar YouTube Kaban Music Production (KMP) Sdn Bhd kena 5 April tu tadi.

PENYELAI SARAWAK

Nembiak Fakulti Perubat enggau Sains Pengerai, Universiti Malaysia Sarawak (UNIMAS) ti ngambi Kus Lutur Perubat nya madah, lagu nya ngenang penyelai Tanah Kenyalang ti kaya enggau pesaka budaya, sejarah, adat sereta main asal pupu bansa.

Pia mega, ku iya, penegap penyerakup pupu bansa di Sarawak chukup narit ati iya sereta gaga ulih belajar di nengeri ti lantang enggau likun tu.

“Aku gagit deka nyerungkai mayuh palan ngelantang ati ditu kelebih agi rumah panjai sereta pemakai asal baka kek lapis, laksa Sarawak, mi kolo, mi kempua, manuk pansuh enggau ti bukai,” terang iya.

Kelimpah ari nya, indu Sarawak ti chukup menyana penuh enggau adat basa sereta bajik baka Kumang nya mega bela enchuri ati iya.

Terang iya, penyelai ngepan indu Iban ukai semina nambah ke pemajik, rega estetika enggau elegan tang nya ngundan reti kediri empu nengah genap aksesori ti dikena sida.

Sugu tinggi ti nyadi jumpang ba pala, ku iya, chukup narit ati iya ti ngelai pemesai rega diri indu Iban ba semua sukut.

“Tu mih ngasuh aku chukup temegah lebuh nyadaka lagu tu laban keterubah aku datai ke Sarawak ngindikka kaki di mengeri Kuching, aku labuh pengerindu enggau penyelai nengeri tu.

“Keterubah aku datai di Sarawak iya nya ba taun 2021 ketegal nampung pelajar di UNIMAS lalu diatu urung empat taun aku udah ngentap pendiau diri ditu.

“Lagu tu besai bendar reti ba aku laban nusui pengasai ati aku ti labuh pengerindu ngagai nengeri tu keterubah aku datai kitu kelimpah tu mih pengepun aku mekuh dunya pemerindang.

“Lebih narit ati, aku nyadaka lagu Iban ti bebida budaya, etnik enggau jaku ari kami Dusun di Sabah.

“Nya alai, aku gagit deka bekunsi penyelai jaku tu ngagai kami sebilik, kaban belayan enggau bala bakih di Sabah,” ku tusui anak Dusun nya penuh enggau pengagit.

Ungkup penerang, dara manis ti ngelulu diri nyadi Kumang ba video lagu Kumang Sarawak iya nya pengempu gelar Unduk Ngadau Sarawak 2024 ti ngembuan darah penakan Dusun-Iban.

NGEMERAT PELAJAR

Lebuh ditanya pasal status iya, Elter Bronstein madah kediri agi bujang lalu pemajik enggau penyelai indu Sarawak chukup narit ati iya.

“Aku enda mantah pemajik enggau penyelai indu Sarawak ti seruran ngasuh aku temegah enggau enda ngetu muji sida.

“Aku ngaku pemenyana sida mujur narit tangkai ati aku tang naka diatu, aku deka meri perati ngagai pelajar aku dulu.

“Tuju ti bendar aku datai kitu iya nya deka nampung pelajar dikena nyapai juluk diri nyadi siku lutur lalu aku meseti nyapai juluk tu dulu sebedau aku ngerunding pasal pengawa begiga ke tawing.

“Aku pechaya ngagai tawing ti diberi Tuhan lalu aku ngarapka bala peminat besampika pekara ti manah aja.

“Nyema tawing diberi Tuhan nya indu Sarawak, aku nerima enggau ati temegah sereta meri terima kasih.

“Nya alai, ngarapka indu betuah nya amat Kumang Sarawak,” ku iya betundi seraya mandangka tuchum manis ti ngundan reti kediri empu.

Nuju mensia mayuh kelebih agi bala peminat iya, aram mih kitai bela besampika chalun lutur tu ngambi bulih tawing ti amat Kumang Sarawak.

SITI BASA

Lagu Kumang Sarawak nya asil ari kerejasama Gerempung Main Asal Kadazan Dusun (KDCA) Sarawak enggau KMP Sdn Bhd ngelai kaul rat sereta penyerakup komuniti Sabah enggau Sarawak.

Kededua raban nya meri peluang ngagai Elter Bronstein bekerejasama enggau sida lalu peluang berega nya enda ditempayaka iya pia aja.

Lebuh ngeleda ke nya lagu Iban, iya pen majak gagit deka mai lagu nya laban ulih nyadaka lagu etnik bukai lalu nya siti basa ti besai reti ba iya siku peranak Sabah.

Ba Sabah, iya apin kala ngerikod enggau ngeluarka sebarang lagu lalu pengudah ngentapka pendiau diri di Sarawak, nya baru iya berengkah mekuh pengawa nya.

Nya alai, iya ngarapka dudi hari, iya ulih ngeluarka lagu Dusun.

Pengudah ngindikka kaki di Sarawak, iya madah kediri bisi ati deka belajar ke jaku Iban lalu bala bakih mayuh ngajar iya nguasa jaku nya.

“Aku bisi siti not ba telefon ti nyadi diksionari jaku Iban dikena aku ngerikod reti jaku Iban ti diajar bala bakih ngambi aku jampat agi nguasa jaku tu.

“Diatu aku udah nemu mimit jaku Iban berindik ari ajar enggau embing sida lalu ngena peluang tu aku meri terima kasih ngagai bala bakih aku,” ku iya.

Nangkan nya, pengerindu Elter Bronstein ba pengawa belagu endang dikembuan iya kenyau ari mit sereta disukung sida sebilik kelebih agi indai iya empu sereta bala petunggal iya ti bela ngembuan penau belagu.

Ba taun 2024, iya masuk Pekit Belagu ‘Sugandoi Kaamatan’ sereta bulih penuduk kedua enggau Anugerah Pemerindang Pemadu Manah lalu berengkah ari nya, iya nerima mayuh peluang ari KDCA Sarawak mandangka penau diri.

Sebedau ngeluarka lagu single keterubah iya, Elter Bronstein kala ngeluarka lagu rasmi Kolej Seroja, UNIMAS ti pelujuk Jiwa Seroja tang nya semina ungkup kolej sida aja.

KENANG MANIS

Anak keempat ari tujuh iku diri menyadi nya madah, iya kala diberi peluang merindang ba siti pengerami ti bela dipasuk artis tebilang Sarawak enggau Sabah.

Nya nyengkaum Dayang Nurfaizah, Bob Yusof, Ramles Walter, Dabra Sia, Apprilisa Sue, Presley P, Khai Puma enggau ti bukai.

“Enti dibanding enggau sida, sapa mih aku tu? Aku ukai sapa-sapa lalu aku ngasai kediri kelalu mit bekunsi panggau sida.

“Puji Tuhan, sida nerima penatai aku enggau manah sereta meri jaku peransang ngambi enda rawan enggau nelebaka diri merindang mensia mayuh ba atas panggau lalu diatu aku nyau majak berani mandangka penau diri,” ku Elter Bronstein.

Pia mega, iya kala dikangau merindang ba Pengerami Gawai Dayak ti diatur ba sekeda endur lalu nya siti peluang berega iya beinteraksyen enggau komuniti lokal sereta ngelala adat enggau main asal sida.

Ba pengawa ngeluarka lagu Iban tu, bala bakih enggau artis ba baruh perabung KMP Sdn Bhd mih ti nyadi inspirasyen iya.

“Sida mayuh meri aku jaku peransang enggau sukung kelimpah majak teperansang lebuh meda mayuh anak Sabah ngaul industri muzik Dayak sereta landik nguasa jaku Iban,” ku artis biak ti manis enggau burak lis nya.

Nya mih ti meri inspirasyen ngagai iya terus bekempit ba pengawa nya enggau konsisten ngeluarka lagu Iban dudi hari.

PENGUJI MERINDANG

Penanggul suntuk awak nyadi penguji besai ditapi Elter Bronstein lebuh mekuh dunya pemerindang Dayak.

Pengiruh belajar sereta ditating enggau mayuh latih universiti ngujungka iya nadai mayuh awak ungkup pengawa ngerikod, ngambi video enggau merindang.

Nya alai, iya meseti pintar magi awak diri entara nembu kereja universiti enggau pengawa merindang.

Pia mega, iya bela napi penanggul bejaku Iban laban iya apin landik nguasa jaku nya lalu mayuh pekara bekaul ti patut dipelajar ke iya.

“Enda ngira nama penanggul dudi hari, aku deka nguji naka ulih mutar penanggul tu enggau manah sereta enda berumban ngaga pemutus,” ku iya nyemetak.

JULUK DUDI HARI

Elter Bronstein ngarapka industri muzik Dayak terus ngerembai enggau majak dikelala ukai semina ba renggat nasional tang antarabansa.

Iya madah, rentak tauka tiun muzik Sarawak chukup nyelai enggau manah didinga sereta ulih negu ati semua orang.

“Nya alai, aku andal industri muzik Dayak ngembuan kuing ti tampak dudi hari lalu lagu Iban majak dikerindu mensia mayuh.

“Pia mega, mayuh bansa bukai ngining enggau ngeluarka lagu Iban,” ku iya.

Iya ngelalau rebak biak berani mantaika penau kelebih agi ba bidang muzik ngambi ulih nampung legasi bala legenda muzik kemaya hari.

Sebedau ngujungka randau, iya meri besai terima kasih ngagai semua orang ti nyukung pejalai iya ba pengawa merindang kelebih agi lagu Kumang Sarawak.

“Terima kasih ngagai bala bakih di Sarawak enggau Sabah baka tim Tasty Yoyo, Brad, Mawar, kami sebilik, kaban belayan sereta bala peminat ti enda ngetu meransang, meri sukung sereta besampika penyulut aku,” ku iya.

Taja pen agi baru bendar ba industri nya, ku Elter Bronstein, iya chukup beterima kasih laban penatai iya ba industri nya diterima enggau manah.

Iya mega meri Selamat Hari Gawai Dayak 2025 ngagai rayat Sarawak enggau Selamat Hari Kaamatan 2025 ngagai rayat Sabah.