Pemakai Dayak dikearap ulih masuk Astro AFC 709

KENA 5 Januari 2021 tu tadi, genap setaun dagang Pelaboh Dayak udah ditumbuh.

Dagang diempu Celestine Keling anak Gemong nya dipunka iya laban sigi rindu nyumai kenyau ari agi mit suba.

“Bulih runding bedagangka pemakai rumah panjai tu kebendar datai ari ati aku empu.

“Tambah mega aku tu sigi rindu amat enti disebutka pengawa bebelaka pemakai taja pengawa tu suah agi dikereja sida ke indu.

“Pengerindu aku ba dunya dagang pemakai tu udah lama, lebuh agi belelang gawa jauh di menua orang, nyau datai ba menua nanga latak (Kuala Lumpur) suba.

“Suah mega tudah diri enggau orang ngeruh ai bedagang ba Borneo Street KL enggau Pasar Pagi (Tamu) Borneo Sri Kembangan,” ku iya lebuh dirandau Suara Sarawak.

ASI GIRAU TEPUS

JAKU KITAI

Peranak asal ari Katibas, Song di Kapit tu siru agi dikangauka Awell madah, bisi cherita kebuah nama Pelaboh Dayak nya dipilih.

“Aku milih jaku PELABOH nya laban ingatka jaku niang ini suba, … udah berasap pelabuh nuan uchu, enggaika bala ibu nuan enda makai lagi.

“Lalu jaku DAYAK nya dikena laban aku bisi ati ngangkatka pemakai kitai Dayak ngagai tikas tinggi agi, enti ulih masuk channel pemakai dalam televisyen baka masuk Astro AFC 709.

“Tu ukai semina jaku aja tang besai amat pengandal aku juluk ati tu ulih dijapai jemah ila ari sukung rat semua,” ku Awell madahka pengingin diri.

Awell madah, kenyau ari hari keterubah dagang ditumbuh suba enggang nyengulai tauka nyangking ba pak kupi You Neng Cafe, di simpang Jalai Sejijak, Matang di Kuching.

“Tu endang dagang kami diri sebilik aja. Puku nya mega datai ari diri empu laban asai sepi aku empai kala minta bantu bedagang ari perintah sebedau tu.

“Kami sebilik ke nyadi Krew Pelaboh Dayak nya aku empu ke nyadi tukang sumai, Natalie ngambi udar enggau endur betanya, Mit dipadu nyadi tukang panggang seraya Binang enggau Undie nyadi staf ke nadai milih pengawa,” ku Awell mai kitai bekelala enggau krew sida.

ASI GIRAU EMPASA

PEMAKAI RUMAH PANJAI

Ngenang pasal pejalai dagang sida sebuat, udah lebih setaun Pelaboh Dayak berasap, puji Tuhan, makin manah timbal diterima ari bala ke datai meli pemakai kia.

“Enti ngenang terubah bejual suba, semina tejualka sekilo dua aja jani tunu tang diatu ulih manggai 15 kilogram (kg) ngagai 20 kg selemai.

“Puji Tuhan mega taja diatu Covid-19 ngerekai di menua kitai, tang bala ke meli semampai datai, meri sukung, pemakai dibungkus ngambi dibai pulai,” ku iya seraya nambah sida bisi bejualka pemakai tunu, pansuh enggau girau.

Entara pemakai rumah panjai ulih dikena mantupka penenguk ba PELABOH DAYAK nya Tunu Jani 3 Layer, Tunu Jani 2 Layer, Tunu Perut Manis, Tunu Perut Raya, Tunu Perut Anak, Tunu Kerigai, Tunu Semeliong, Tunu Pala, Tunu Dilah enggau Tunu Ulu Sengayuh.

Dia mega bisi nyual Pansuh Jani, Pansuh Manuk enggau Pansuk Ikan kelimpah pemakai girau baka Asi Girau Daun Empasa, Asi Girau Kemiding, Asi Girau Ensabi enggau Asi Girau Tepus.

“Pemakai pemadu dikerindu sida ke datai meli kitu tauka laku nya endang pemakai tunu kelebih agi tunu perut manis, dagin jani tiga enggau dua lapis, umbas pengemu sereta perisi.

“Bisi sekeda nyau enda ampit enti laun datai, kadang pulai mai ati lebu laban enda bulih utai dikingin ati.

“Nya kebuah, suah agi sida ke teleba meli pemakai ba aku ditu deka madah tauka booking dulu laban nangika diri enda ampit.

“Sida semina datai ngambi pemakai ke diudar nya enti udah mansau,” ku iya lalu tuchum lebuh ngenang ulah sekeda sida ke ngelawa Pelaboh Dayak.

ANGKAT MAKAI… Pansuh jani, pansuh manuk enggau pansuh ikan bisi dijual ba Pelaboh Dayak.

BASA DIBALAS JEREKI

Tambah mega ku Awell, sida endang beratka kualiti enggau servis ngagai bala ke meli nyengkaum ari sukut pemeresi pemakai ke disumai enggau endur bedagang.

“Ba aku, dagang tu cheremin ngagai ulah kitai, chara kitai ngintu enggau mela pemakai ti mandangka basa ngagai orang ke datai mai jereki ngagai kitai.

“Enti pemakai kitai beresi, endur bedagang kemas, kitai ke mela pemakai mega enda kamah dipeda, tu entara pematak orang datai bekunsi jereki sida.

“Ari nya aku pechaya, enti kitai nemu bebasaka orang bukai lalu enda sepeneka beambi ulih, ngeletak rega kelalu tinggi, dia Tuhan mega ngibun pengawa kitai, jereki enda putus baikka nya ari pengerai tubuh, diau lantang enggau asil dagang.

“Kelimpah ari nya, nentuka pemakai dijual bisi kualiti, aku semina meli ari bala taukey jani ke udah ditemu likun ngintu jani enggau dikelala,” ku Awell muka cherita pasal chara bedagang ke patut dikembuan enti deka maju.

Iya madahka diri kala gawa nyadi soldadu tasik tauka Navy kira 24 taun pengelama sebedau pinchin kena 16 Julai 2019, belelak enda lama sebedau ngepunka dagang Pelaboh Dayak nya.

SEMAMPAI BISI PEMINTA… Awell begambar enggau siku ari orang ke suah meli pansuh dia.

NGANGKAT PEMAKAI DAYAK

Baka udah disebut Awell lebuh ngepunka randau tadi, kelimpah ngangkatka pemakai Dayak dikelala serata dunya, juluk besai iya endang deka ngemansangka dagang pemakai asal nya.

“Enti bisi jereki jemah ila, aku deka muka dagang Rumah Asap tauka BBQ Station kediri empu.

“Nya alai aku ngarapka kitai Dayak ulih nyukung dagang pemakai bansa kitai sereta bekunsika buah runding baka ni chara kitai ulih mai pemakai tu ngambi diterima datai ba menua luar.

“Masuk channel Astro AFC 709 nya siti pengawa ke ulih digaga kitai lalu pengawa numbuhka Dayak Food Street nya endang patut diperunding,” ku iya nibarka jaku peransang.

Nambahka nya ku Awell, pemakai asal kitai tu kebendar endang mayuh peminat dataika orang ari menua ribai mega ngumbai pemakai nya jauh nyamai bepelasarka timbal diterima ari media rama.

DATAI TUMU

Ngena peluang nya, Awell meri tabi basa enggau terima ngagai semua orang ke semampai nyukung dagang sida sebilik dataika ulih beretan taja pandemik ngasuh ekonomi menua kusut.

“Terima kasih ngagai raban ari Suara Sarawak laban udah meri peluang ngagai kami, Pelaboh Dayak bekunsika kenang enggau cherita dagang ke agi baru endar tu.

“Terima kasih ngagai bala kita ke semampai datai meli, nyukung dagang kami ngelama tu, ari sukung kita kami ulih terus bedagang, ngereja pengawa dikerindu,” ku Awell nyimpul randau.

Barang sapa deka nemu penerang pemadu baru pasal dagang enggau bansa pemakai bisi dijual ba Pelaboh Dayak tau ngelawa Facebook PELABOH DAYAK tauka kirum ngagai lumur WhatsApp 0193380655 enggau 0192110377 sereta https://g.page/pelaboh-dayak-malihah-route-502?share

Nitihka penerang, dagang Pelaboh Dayak dibuka musin Covid-19 tu berengkah ari pukul 4 lemai nyentuk pukul 10 malam kena Hari Dua ngagai Hari Minggu lalu tutup sehari aja, Hari Satu.

Taja pia, sida deka tutup tumu agi enti sema pemakai dijual abis tumu ari jam ditaga, nya alai barang sapa deka meli pemakai dia diperansang datai tumu.

Kelimpah ari nya, bala ke datai meli dipinta nitihka Atur Standard Pengawa (SOP) udah ditetap baka nangkup sengkabung mua enggau nyaga pemeresi diri nentuka pengelikun semua.

Suara Sarawak