Pemanah adat basa peranak Rh Majang dipuji

SARATOK: Penyiru enggau pemanah adat basa peranak Rumah Majang, Ukir di Awik ditu lebuh ngelaluka penatai bala temuai endang patut dipuji.

Sapit Menteri Pengeluar Kuasa enggau Pengeraja Asal, Ali Biju, madahka diri berasai tepantup endar ati udah dilaluka penatai ba rumah panjai nya.

Ku iya, tu pejalai nemuai keterubah ngagai menua Ukir enggau ngabas peranak dia.

“Ngelamatu semina ninga rita aja tang seharitu diberi peluang begulai, berandau sereta bebuti enggau kita serumah lalu dibai serumpu makai.

“Berasai lantang ati ditunga sida ke tuai ti agi regas endar, dirandau bala nembiak enggau sida ke besai tuai ke alai macham batang randau dibantai.

“Chukup tepantup ati ulih nemuai enggau ngabas rayat pengudah Atur Tagang Pejalai (PKP) ketegal pengerekai Covid-19 diatu ditendu,” ku iya.

Ali ti mega Kaban Parlimen Saratok mansutka jaku nya rambau Progam Ngetu Merarau Begulai Enggau Rayat Rumah Majang ditu, tengahari kemari.

Nambahka nya ku iya, program sehari nya nadai ngangauka peranak rumah panjai bukai mega ketegal ngasika Standard Atur Pengawa (SOP) PKP Penyuman dipejalai diatu.

“Ukai enggai ngangauka bala bukai sama ngulu program ditu tang kitai ngasika SOP ti udah ditetap dikena nyaga pengelikun semua ari Covid-19.

“Ngelama tu sigi ditesau magang bala ke diau besemak enti bisi program, abis nadai ktubuh ke datai 500 ngagai 600 iku, suah mega manggai 1,000 iku bala ke datai.

“Tang SOP kitai semina natak 250 aja ulih begempuru. Nya kebuah aku nadai nesau bala bukai.

“Ngarapka penerang tu ulih nyaut peragam ati kebuah enda ngangauka mayuh tubuh.

“Tuju kitai endang deka nyaga pengelikun enggau pengerai semua. Enti sema penusah tu udah pukas jemah, kitai tau nandu baru program baka tu,” terang iya.

KENANG KAMI… Tuai Rumah Majang nyuaka tepa ngagai Ali ungkup kenang dudi hari

Suara Sarawak