BINTULU: Segang pemansang enda patut nyadi dalih ninggalka adat enggau budaya tang patut terus dijaga nyadi identiti bansa, ku Sapit Premier Sarawak, Datuk Amar Douglas Uggah Embas.
Iya madah, adat enggau budaya siti bansa tauka etnik patut terus ditan laban nya identiti nyelai ti nyadi pugu penyerakup komuniti pupu bansa di Sarawak.
“Adat enggau budaya siti etnik endang patut ditan dikena nentuka pekara nya mengkang nyadi identiti ti negap penyerakup pupu bansa di nengeri tu,” ku iya.
Uggah bejaku munyi nya rambau bejadi Pengerami Ngabang Gawai Dayak ti diatur Parti Pesaka Bumiputera (PBB) Kakus ba siti restoran ditu, malam kemari.
Iya nyemetak madah, pemansang nengeri patut dipejalai seretai enggau pengawa negap komuniti laban enti nadai budaya, siti etnik enda nyalah nadai pengelala diri.
Ku iya, pengawa ngena ngepan asal enggau ritual adat baka pengawa miring serimbai pengerami Gawai Dayak patut ditampung kelai meri terima kasih enggau minta berekat.
“Pengawa tu mandang identiti komuniti sereta nyadi lambang penyerakup ti patut ditan,” ku iya.
Ngelansa pasal pemansang nengeri, iya meri terima kasih ngagai Premier Sarawak, Datuk Patinggi Tan Sri Abang Johari Tun Openg berindik ari bemacham inisiatif ti mujur dipejalai nyengkaum pemansang infrastruktur baka jalai alun enggau bekal kuasa karan ti meri pemaik ngagai rayat.
Iya mega meri terima kasih ngagai Menteri ba Premier Sarawak, Datuk Seri John Sikie Tayai sereta Kaban Parlimen Selangau, Edwin Banta berindik ari jasa enggau pengeransing seduai gawa mantu ngemansang menua pesisir.
“Perintah Gempung Parti Sarawak (GPS) seruran chakah mantu rayat enda ngira tirai juru lalu kitai terus nyingkang ke mua nentuka pemansang ti betampung,” ku iya nyemetak.
Ba sukut pelajar, Menteri Infrastruktur enggau Pemansang Penyangkai Kapal nya madah, perintah nengeri nyendia peluang pelajar pechuma ba institusyen pelajar tinggi ti diempu nengeri tu.
Ku Uggah, peluang nya dibuka ngagai semua rayat Sarawak ti ulih nangkup semua atur tama kia ba bidang sains, pekara akaun enggau undang-undang.
Tampung iya baru, perintah ngagih belanja sepenyampau RM50 juta dikena ngaga projek jalai Sungai Arip ti deka ditinda ba bulan Julai tu ti ngaul jalai ari Sekula Primari (SK) Arip ke Rumah Mambang, Rumah Laja enggau Rumah Anas.
