KUCHING: Insfrastruktur di menua tu dikearapka ulih mansang 6.5 peratus setaun setipak enggau pemansang penatai pemisi sereta status menua datai ba taun 2030.

Kepala Menteri Sarawak Datuk Amar Abang Johari Tun Openg mansutka pekara tu lebuh nyimpul jurai ba Aum Dun ke-18 ditu, tadi.

“Sarawak enda ulih nyeliahka pekara ekonomi lubah mansang tang perintah bebendar ngatur strategi nentuka menua tu setipak enggau pemansang jeman.

“Ngemansangka menua ukai pengawa muntang dikereja tang begunaka pengeliat ati sereta pengepuh dikena nyapai enggau ngulihka kuasa makit dunya,” ku iya.

Pemansang menua mega bepanggai ba pekara rama enggau ekonomi kelebih agi sekula, teknikal, intitusyen, pansik, sepital, jalai enggau jematan sereta infrastruktur pemun ke bukai ti begunaka belanja tinggi.

“Puku besai enggau chara musinka puku ba ekonomi deka meri peluang ngagai dagang mit ngerembai kelebih agi ngaul pekara logistik, perengka pengangkut, pemansang produk enggau eksport,” ku iya nerang silik.

“Nya kebuah Perintah Sarawak berengkah beranakka puku ba pemansang insfrastrutur nentuka pemansut enggau rizab menua chukup,” tandu iya.

Perintah mega udah bejalaika pengawa ngemansang, nyeruri enggau ngemanahka infrastruktur sereta bejalaika projek utiliti besai agi ungkup pengelantang rayat enggau menua.

“Entara projek besai dipelanja perintah baka jalai, jematan, bekal ai beresi, bekal karan, arus penyambung enggau perengka guna bukai.

“Tuju kesemua pengawa tu semina deka meri pemaik ngagai rayat lalu sida ulih ngasaika pengidup ti lantang enggau meruan agi.

“Tu mega meri peluang ngemansangka dagang menua tu, berimbaka tanah, logistik enggau jalai alun meruan agi ngelawa menua pesisir,” ku iya.