KUCHING: Pemansang menua pesisir meseti dikemerat dikena nambah pengelantang komuniti dia sereta nambah tikas pengulih ekonomi sida bepelasarka pengulih ti bisi dia.

Kaban Kunsil Nengeri (ADUN) Katibas, Lidam Assan madah, projek rayat ngaga Jalai Ulu Bangkit enggau Jematan Bangkit benung dipejalaika raban Opis Kereja Raya (JKR) Sarawak.

Iya madah, pansik perimeter ungkup Katibas udah dikemendar Opis Menteri Pengeraja Asal sereta Opis Pemansang Mengeri enggau Tanah lalu berengkah dipejalai ba bulan Januari 2024 nyentuk diatu.

“Pengawa ngaga Jematan Musah beguna amat dikena nembuka jalai Ejensi Pemansang Hulu Rajang (URDA) Ng Banjor ngagai Makut.

“Aku ngerah URDA ngerumban pengawa ngaga jalai Banjor Makut ngagai Rumah Peter Nanga Lian laban kededua projek tu udah lama tejanggal.

“Enti diperatika aku, jalai tu enda engkeman digaga ba endur tu laban kelalu semak enggau Sungai Katibas sereta patut diberi perati,” terang iya.

Nangkan nya, ku iya, Opis Menteri Utiliti pen enda ulih nyambung batang paip enggau tali karan ba endur nya ketegal penanggul laun ba projek jalai URDA nya.

Lidam mansutka jaku nya rambau bejuraika jurai basa ngagai jaku Tuai Pemegai Menua (TYT) Nengeri Sarawak, Tun Pehin Sri Dr Wan Junaidi Tunku Jaafar ba Aum Kunsil Nengeri (DUN) Sarawak Ke-19, ensanus.

Iya minta opis menteri ngerumban pengawa nyendia infrastruktur ba Katibas.

Nambahka nya, ku iya, eko dagang temuai enggau agro dagang temuai siti ari pengulih ti nyungkak ngagai sosioekonomi menua pesisir.

Iya mega madah, Opis Kampung bekerejasama enggau Opis Betanam Betupi deka muka Lanjak Entimau urung berapa kilometer persegi penyauh kena nyukung dagang temuai ba Katibas.

“Aku bisi madah ngagai perintah GPS ngambi bejalaika polisi ‘Meli Produk Lokal Dulu’.

“Aku mega bela madah ngagai Opis Pelajar ngambi nyukung polisi tu lalu ngemendar bala pemekal pemakai ngagai sekula meli produk bala pekebun lokal,” ku iya.