LAWAS: Pekara bekaul guna, praktikal enggau pengelikun patut diperunding ba pengawa merambu tetiap projek pemansang dikena nentuka fasiliti ti disedia nangkup peminta rayat enggau ulih dikena.

Sapit Premier Sarawak, Datuk Amar Awang Tengah Ali Hasan madah, pekara gaya langkar siti-siti projek mega patut ditipak enggau gaya taba, utai diguna penguna sereta tuju pemansang, ukai semina ngemeratka estetika aja.

Ku iya, arkitek enggau raban bekaul patut berati gaya kebendar taba sebedau nentuka gaya langkar sereta perambu projek nentuka fasiliti disedia praktikal enggau likun dikena.

“Pekara bekaul guna, praktikal, pengelikun enggau pemanah nyadi empat batang pekara ke patut diberi perati maya merambu siti-siti projek pemansang,” ku iya.

Awang Tengah nyebut pekara nya lebuh ngatur pejalai ngabas Projek Anjung Usahawan Noor Islam di Kampung Noor Islam, Kuala Lawas, ditu empai lama.

Iya mega deka ke projek beungkus RM2.35 juta nya tembu digaga September tu, tumu agi ari taga asal bulan Oktober. Ku iya, projek nya deka nyendiaka endur ngagai rayat menua nya bejalaika pengawa dagang, lebih agi dagang mit enggau jelan pemesai (PKS).

Awang Tengah madah baru, fasiliti nya ulih dikena nyadi pelasar ngaga asil enggau ngelaku produk lokal nyengkaum pemakai sereta produk ari pengelandik jari sereta penatai pemisi peranak dia.

Nya alai, Kaban Kunsil Nengeri (ADUN) Bukit Sari nya meransang orang dagang lokal ngena manah fasiliti nya dikena nambahka kualiti produk, bekenaka teknologi enggau pegulih makit, kelimpah ukai semina bepanggai ba makit lokal aja.

Iya mega meransang orang dagang nyerungkai makit besai agi, lebih agi Brunei enggau Singapura, berunding ke penuduk strategik sereta kaul dagang enggau menua sepiak.

Bela datai maya nya Kaban Parlimen Lawas, Dato Henry Sum Agong; Direktor Ejensi Pemansang Kandang Menua Utara (NRDA), Datu Ubaidillah Abdul Latip sereta Sekretari Politik Premier Sarawak, Awangku Jinal Abedin Dato Pengiran Jawa.- EDISI UKAS