Pemenggi gelar Dayung Sangon, Dari Pogan Serembu ditemu 25 Mei

BAU: Semilan iku dara bajik bepekit ngerebut gelar Dayung Sangon enggau lima bujang sigat berebutka gelar Dari Pogan ba malam kepenudi pekit nyerumba Pengerami Mantar Gawai Serembu di Balai Komuniti Siniawan kena 25 mei tu.

Entara pemekit Dayung Sangon mujur tama pekit kepenudi iya nya Shaolin Tolhip,19, Vanessa Tinella Patrus,18, Caulinna Kiboi,18, Jessie Gabriella,20, Eina Lebron,18, Hanna Quensey,18, Yvonne Natasha Atar,21, Paverina Angely,18, enggau Veronica Michael, 25.

Seraya gelar Dari Pogan diperebut Joremy Johnny, 19, William Gano Patrus,19, Roland Graem, 22, Dreggory Hill, 19, enggau Harisson Alphan, 18.

Champion pekit deka pulai ngemai perais mata duit RM2,000 nyengkaum setipikit, hamper, jumpang, selampai, segempung bungai enggau trofi.

Seraya penuduk lumur dua deka nerima RM1,000, selampai, trofi, segempung bungai enggau hamper lalu penuduk ketiga nerima RM700, selampai, segempung bungai, trofi sereta hamper.

RUMPAS DIPEDA… Rintai pemekit kepenudi Dayung Sangon enggau Dari Pogan deka bepekit kena 25 Mei tu. – Gambar Iskandar Razak.

Lima pemenang perais sagu ati deka nerima mata duit RM500, trofi, hamper enggau setipikit.

Kelimpah ari nya, tiga gelar bukai ti deka diperebut sida tu iya nya Dara enggau Bujang Dikerindu ti deka nerima RM200, trofi sereta selampai.

Kelimpah ari nya, gelar Dara enggau Bujang Fotogenik deka pulai ngemai trofi, selampai enggau gambar pemenang deka digagaka bingkai ti manah.

Seraya pemenang Anugerah Khas ungkup pelajar deka nerima mata duit penyampau RM1,000.

BAJIK…Pemekit gelar Dayung Sangon. – Gambar Iskandar Razak.

Entara temuai dipebasa disadang datai malam nya Menteri Pelajar, Sains enggau Pansik Teknologi, Dato Sri Michael Manyin Jawong.

Malam pengerami mega deka diperindang bala artis ti deka datai ngerichahka Pengerami Mantar Gawai Serembu kena 24 enggau 25 Mei tu.

Bala penanyi ti bisi dikangau merindang iya nya Jimmy Palikat ari Sabah, At Adau, Timothy, Lucy Rijut, Dino sereta sekeda raban band menua tu ke bukai.

CHUKUP GAP…Empat ari lima pemekit Dari Pogan ti bisi datai lebuh pengawa ngambi gambar diatur. – Gambar Iskandar Razak.

Suara Sarawak