KOTA SAMARAHAN: Perintah Besai tetap meri pemeri khas RM300 juta ngagai Sabah enggau Sarawak bepelasar ke Perkara 112D Konstitusyen Perintah Besai.
Sapit Menteri Besai, Datuk Seri Fadillah Yusof madah, penyampau nya semina nganti timpuh digazet sebedau dibayar ngagai kededua nengeri nya.
“Naka diatu, RM300 juta nya deka digazet lalu pengudah digazet, sida deka berengkah mayar.
“Pekara tu enda ibuh agi diengkah ba Bajet 2024 laban tu endang udah dipesetuju,” ku iya.
Fadillah mansutka jaku nya rambau dirandau pemberita pengudah ngelanchar Program Hari Berandau enggau Koperasyen Kluster Koko ba Palan Pemansik enggau Pemansang Koko (PPPK) ditu, kemari.
Iya ti mega Chairman Komiti Teknikal Sempekat Malaysia 1963 bela ngenukuka formula baru bekaul pemeri khas nya naka diatu tang nya bedau diputus penuh.
“Formula bedau tang penyampau RM300 juta nya udah sah. Taun baru pen sebaka nyentuk kitai udah ngaga pemutus,” ku iya.
Berengkah ari taun 1973, tikas pemeri khas Sabah enggau Sarawak bela mengkang ba tikas RM26.7 juta enggau RM16 juta sebedau ditiki ngagai RM300 juta.
Perintah Besai bela nyerahka kuasa ngemendar projek Perintah Besai ngagai Opis Teknik Sabah enggau Sarawak ungkup projek ti beungkus nyentuk RM50 juta.
Ba bulan Januari tu tadi, Menteri Besai ti mega Menteri Pekara Wang, Datuk Seri Anwar Ibrahim nyemetak madah deka mantai siti formula khas ti dipesetuju begulai ngambi dikena nentu penyampau pemeri khas ungkup Sabah enggau Sarawak.
Ku iya, formula pemeri khas nya enda betatak ba sekeda penyempau ti ditetap laban nya bepanggai ba pengulih ekonomi pekara wang menua.
