KUCHING: Perintah Sarawak ngaga pemutus neritka baru atur nagang pejalai entara pelilih ba nengeri tu bepun 1 ngagai 14 Ogos, ditu kemari.
Sapit Kepala Menteri Datuk Amar Douglas Uggah Embas madah, bagi menua di Sarawak dibagi ngagai dua zon iya nya Zon 1 mungkur Bagi Menua Kuching, Samarahan enggau Serian.
Pia mega ku iya, bagi Zon 2 tu mungkur Bagi Menua Sri Aman, Betong, Sarikei, Sibu, Kapit, Mukah, Bintulu, Miri enggau Limbang.
“Nya alai, pejalai ari Zon 1 ngagi Zon 2 enggau ke bukai mesti minta pemendar (permit) ari polis dulu sebedau bejalai.
“Taja pia, pejalai dalam zon dikemendar enggau polis enda neritka atur sereta enda ibuh minta pemendar ari sida,” ku iya nyemetak madah ba aum pemberita Covid-19 ti diatur ba Begunan Dun Lama, sehari tu.
Terang iya, entara pejalai ti dikemendar iya nya bejalaika pangku pengawa rasmi, pengereja pengawa servis beguna, bisi bala rabat, bala sakit raya enggau beperesa pengerai.
Ngelansa silik pasal jalai alun diempang ari Zon 1 ngagai Zon 2, Uggah madah bisi jalai deka diempang polis tang enda dipejalai ba mengeri.
“Kami udah nganjung peminta ngagai Menteri Kanan (Penyaga Menua), Datuk Seri Ismail Sabri Yaakob enggau iya udah mai peminta kami tu ngagai Kaunsil Pengelikun Menua (MKN).
“Lebuh kami deka neritka pekara nya, tu mesti digazet piak PDRM enda tau enda bejalaika pangku pengawa ngatur pejalai ari Zon 1 ngagai Zon 2,” terang iya.
Ungkup rikod, Ismail Sabri udah madahka Perintah Besai udah ngemendar peminta Perintah Sarawak neritka pejalai entara Zon ba Sarawak bepun 1 ngagai 14 Ogos.
Iya mega madah, barang sapa ti deka mindah entara zon mesti minta pemendar dulu ari piak PDRM seraya pejalai dalam zon dikemendar.
