KUCHING: Timbal diterima ngelui ari disadang ba Bazar Gawai Dayak enggau Ethnocultural Festival 2026 di Miri ngayanka program nya ukai semina program main asal aja, tang nyadi pelasar besai ngeranchakka ekonomi lokal.

Sekretari program, Kaunsilor Martin Dinil madah, peminta ti chukup mayuh ari orang dagang lokal ngujungka 79 bansal bejual ti disedia nyau enda chukup, lalu bisi rintai bala ti nganti.

Ku iya, pekara nya ngayan pengandal orang dagang ngagai pengulih pengerami nya endur ngiga penatai pemisi sereta ngerandang peluang ekonomi baru.

“Kitai nyendia urung 79 bansa bejual, tang agi enda chukup laban peminta chukup mayuh lalu agi tubah ke nganti,” ku iya lebuh dirandau pengudah Program Juh Randau di Studio UKAS.

Martin madah, pengerami ti diatur ari 1 nyentuk 23 Mei nya nyelinting asil bejual manggai RM2 juta, nambah dibanding RM1.8 juta ti dirikod taun nyin tadi.

Iya mega madah, pengerami diatur sekali tu disadang matak pengusung ari selampur Sarawak laban isi program tikas nengeri lalu enda ditatak ngagai Miri aja.

Seraya Tukang Wang Program, Dr Mary Chalang madah, sukung Perintah Sarawak nengah agih belanja RM1.5 juta mega negap pejalai program besai empas nya.

Iya madah, sukung tegut perintah ngasuh pengerami nya ulih diatur berurun agi enggau meri penguntung terus ngagai rayat, kelebih agi orang dagang mit enggau komuniti menua.

Ke penemu, pengerami diatur lebih tiga minggu nya ukai semina nyagu pesaka budaya Dayak, tang diperati bisi pengulih besai nyadi penyungkak nengah dagang temuai budaya enggau aktiviti dagang.