KUALA LUMPUR: Sepenyampau RM94.8 juta udah dikemendar ungkup pemansang Parlimen Selangau sepanjai timpuh dua taun nyengkaum sektor besai baka infrastruktur enggau pelajar.

Menteri ba Opis Menteri Besai (Sabah enggau Sarawak), Datuk Ir. Ts. Mustapha Sakmud madah, ari penyampau nya, RM52.82 juta dikemendar ba taun 2025 nengah Langgur Pemansang Malaysia Lumpar Ke-12 (RMK-12) engau belanja dirikodka sepenyampau RM17.15 juta.

Ku iya, ba taun 2026, Perintah Besai ngemendar RM41.98 juta nengah RMK-13 seraya penyampau belanja naka September sepenyampau RM11.10 juta.

Mustapha Sakmud nyaut tanya Kaban Parlimen Selangau, Edwin Banta ti minta Menteri Besai ngerintai penyampau belanja pemansang ti diagih ngagai Parlimen Selangau nitih sektor besai nyengkaum infrastruktur, pelajar, pengerai enggau bantu rayat naka September 2026.

Ku iya, Perintah Besai semampai berati ke pemansang di Sarawak, kelebih agi ba kandang menua pesisir dikena nyamin pengelantang rayat sereta ngedut takah pemansang entara kandang menua.

“Pejalai projek pemansang deka terus dipatau rat nentuka pengawa nya dipejalai lengkas, nemban enggau meri empas ngagai rayat.

“Bepelasarka penyampau ti dibantai, penyampau belanja ti dirikodka dua taun nya sepenyampau RM28.25 juta dibanding belanja dikemendar iya nya RM94.8 juta,” ku iya.