KOTA SAMARAHAN: Perintah Sarawak merambu ngerembaika inisiatif Pelajar Tinggi Pechuma Sarawak (FTES) ngagai anak Sarawak ti nampung pelajar ba palan pelajar tinggi perintah (IPTA). Premier Sarawak, Datuk Patinggi Tan Sri Abang Johari Tun Openg madah, nya nyengkaum Universiti Malaysia Sarawak (UNIMAS) enggau Universiti Teknologi MARA (UiTM).

Ku iya, langgur nya dibantaika Mandal Canselor UNIMAS, Profesor Datuk Dr Mohamad Hata Rasit lalu deka diperundingka iya ungkup dikemendarka.

“Sehari tu, aku berasai gagit ninga jaku Mandal Canselor UNIMAS ti ngarapka program FTES dikerembai ngagai anak Sarawak ti belajar ba universiti perintah, kelebih agi ba UNIMAS enggau UiTM ti ngembuan status ‘K’ ba tingki. “‘Insya Allah, perambu tu deka dikemendarka,” ku iya.

Abang Johari bejaku munyi nya rambau bejadi Pengerami Konvokesyen Ke-30 UNIMAS ba DeTAR Putra UNIMAS ditu, kemari.

Ku iya, Perintah Sarawak terus beranakka puku ba pemansang modal mensia nengah pengawa bejalaika FTES ba empat buah universiti enggi perintah menua kenyau ari taun 2026.

Iya madah, ba taun 2027, perintah ngagihka RM21 juta dikena bejalaika skim nya, ti disadang meri penguntung ngagai 10,600 iku nembiak.

Berebak enggau nya, Abang Johari madahka Sarawak agi betapi enggau pemar suntuk raban perubat ke alai urung 1,200 pengawa puang lutur di nengeri tu dirikodka.

Ku iya, tebal agi menua begunaka lutur, pakar perubat enggau profesyenal pengerai ti meretika guna komuniti menua dikena nentuka servis pengerai ulih disedia enggau meruan, nyengkaum di menua pesisir enggau menua entigis.

“Bidang perubat enggau sains pengerai ukai semina begunaka kitai nguasa penemu enggau pengelandik profesyenal aja, tang mega begunaka runding ti kritikal, penyiru enggau pengeransing meri servis ngagai komuniti,” ku iya.

Nya alai, iya madahka Perintah Sarawak nengah Yayasan Sarawak udah bejalaika sekularship khas ungkup program perubat di UNIMAS kenyau ari taun 2017 dikena ngadaka mayuh agi lutur anak Sarawak. Ku Abang Johari, pengawa melanja program nya udah mujur nempa 200 iku lutur perubat ti nerima belanja ari Perintah Sarawak.

Iya madah, penerima sekularship ti mujur nembuka pelajar mega dipinta kena bon servis sepengelama 10 taun di Sarawak, nitihka atur sempekat nya.

Iya nyemetak madah, tuju sempekat nya dikena nentuka pengawa beranakka puku perintah nengeri ba pelajar perubat meri penguntung timpuh panjai ngagai rayat, kelebih agi komuniti menua pesisir ti balat begunaka servis pengerai.