KOTA SAMARAHAN: Premier Sarawak, Datuk Patinggi Tan Sri Abang Johari Tun Openg meri perambu ngambika Universiti Malaysia Sarawak (UNIMAS) nengah Yayasan Sarawak meri sekularship penuh ngagai nembiak lutur falsafah (PhD) ti deka belajarka potensial nyegulaika (penggabungan) bidang perubat Timur enggau Barat.
Ku iya, pansik nya beguna dikena nyerungkai pengulih pengeraja biodiversiti Sarawak ba pengawa ngemansangka chara perubat ti ulih ngangkatka kualiti nyaga pengerai ungkup rayat. Iya madah, pansik perubat integratif ulih dipeda nengah tiga batang bidang iya nya perubat botani, perubat regeneratif enggau inovasyen bioperubat.
“Nya alai, aku merambu ngagai UNIMAS enggau Yayasan Sarawak awakka meri sekularship penuh ngagai chalun PhD dikena belajarka potensial nyegulaika bidang perubat Timur enggau Barat.
“Pansik tu ulih dipejalaika nengah kerejasama palan pelajar tinggi menua luar, laban Sarawak ngembuan biodiversiti ti besai ti patut dipansik ngambika kitai ulih meda potensyen guna sukut nya dalam bidang perubat personal,” ku iya.
Ku Abang Johari, pansik nya mega ulih mungkur bidang genomik enggau perubat personal dikena mansik chara ngintu pengerai ti lebih beselinting.
Iya nyemetak madahka pengawa nyegulaika bidang perubat Timur enggau Barat patut dipansik dikena nguna pengeraja asal Sarawak dalam pengawa ngangkatka pengelantang komuniti menua.
