KUCHING: Perintah Sarawak ngena ADAM AI ke kaling pemintar digaga (AI) kelebih agi mantu orang gawa perintah akses penerang perintah, ngaga analisis polisi enggau nyendiaka dokumen rasmi ke sikar agi.
Premier Sarawak, Datuk Patinggi Tan Sri Abang Johari Tun Openg madah, pemansang aplikasyen nya entara pengawa ngena asil pengawa meranak puku nengeri ba infrastruktur digital.
Ku iya, aplikasyen nya ulih dikena ba servis Perintah Sarawak sereta nya ngayanka pengawa meranak puku ba bidang nya udah bisi asil ke nyata diatu.
“ADAM AI tu nyaup orang gawa perintah kitai. Aplikasyen tu nyendiaka kereban ngagai pegawai bisi akses penerang perintah ti dikemendar, mantu pansik enggau analisis polisi sereta ngemanah pengawa ngaga dokumen rasmi.
“Tu senutuk enggau sulu jaku Pemintar Ungkup Semua Orang Gawa Perintah ti ngayanka niat Perintah Sarawak nyikap pegawai ngena teknologi enggau penemu ke ulih nambahka penemban pengawa sida,” ku iya.
Abang Johari nibarka jaku nya rambau Pengerami Ngintu Hari Servis Perintah Sarawak 2026, ditu, kemari.
Taja pia ku iya, teknologi AI enda ulih nyilih pengasai ati mensia, integriti tauka akauntabiliti maya ngaga pemutus ke perintah.
“AI ulih nyaup kitai ngulihka penemu, ngaga analisis penerang enggau berunding ari mayuh sukut penemu, tang enda ulih nyilih pengasai ati mensia, integriti tauka akauntabiliti.
“Tanggungpengawa ba pemutus perintah enda tau enda seruran ba penemu pegawai ti dilempai ngaga pemutus nya,” ku iya nyemetak.
Ngenang silik, Abang Johari madah, pemun pemansang penau nya ditegap nengah pengawa ngelancharka Pelasar Infrastruktur AI Berdaulat Sarawak kena 17 Ogos nyin tadi.
Ku iya, pelasar nya dikena nempa penau AI kediri enggau ulih matau mayuh agi data perintah sereta ari ni penerang digital nengeri.
“Taja pia, nyendiaka infrastruktur aja enda chukup enti penau tu puntan dikena ngaga aplikasyen ke nyaup orang gawa perintah ngadu pengawa sikar agi.
“Teknologi patut ngelui ari pejalai pengawa digital ke bisi diatu.
Teknologi nya meseti ngasuh kitai ulih pintar agi gawa, ngena penerang ke manah agi enggau meri pengelantang ngagai rayat,” terang iya.
Ku Abang Johari, AI, automasi, analisis data enggau teknologi digital buka majak ngubah chara organisasyen gawa, lalu nya begunaka orang gawa perintah ngembuan pengelandik ngena semua nya bisi tanggungpengawa enggau nemban.
Berebak enggau nya, iya madahka pemansang penau, penemu pakar sereta pengulih institusyen patut sejalai enggau pengawa meranak puku teknologi ngambi asil ekonomi enggau rama nyata diasai. – ZARINA ABDULLAH
