SERIAN: Gerempung Bansa Dayak Bidayuh (DBNA) mujur ngasuh komuniti Bidayuh arap ngambi ngaga surat pala tanah Hak Adat Bansa Asal (NCR) sida.

Kaban Kunsil Nengeri (Adun) Semuja, John Ilus madahka inisiatif nyukat tanah NCR nya mega nerima perati ari Kepala Menteri Datuk Patinggi Dr Abang Johari Tun Openg.

Ku iya, ba program randau di Betong apin lama, Kepala Menteri udah ngelalau komuniti Iban ngambi nitihka inisiatif ti dipejalaika DBNA.

“Pekara tu beguna amat ngambika pejalai berengkah ari nyukat kelingi tanah lanchar sebedau ngaku tanah nya.

“DBNA semina ngemuntangka pengawa ti dipejalaika piak Opis Tanah enggau Survei Sarawak,” ku terang iya.

Iya mansutka jaku nya dalam Randau Netapka Tagit Pengawa Nyukat Kelingi Tanah NCR Bagi Menua Serian 2020 di Dewan Santapan Serian, ditu ensanus.

Berebak enggau nya, John Ilus madahka inisiatif dipejalai DBNA nya mayuh udah mutarka laya pasal tanah NCR kelebih agi ba sitak komuniti Bidayuh.

Nambahka nya ku iya, bisi lapan sitak Bidayuh deka disukat enggau dikeluar pala tanah abis laun kena bulan June 2020 tu ila.