BAKA ti udah disemaya, kitai deka ngenang lenak agi pasal pejalai pengidup Chryan Christopher ba dunya content creator.

Sekali tu kitai deka ngenang pasal tuju, inspirasyen enggau pengelebih dunya content creator.

“Terima kasih nuju mensia mayuh ti udah macha sekeda singkang pengidup aku, enda nyangka pejalai ti pedis ditujah nyau majak mudah agi ga diatu laban jalai ti repa udah dulu dirandang.

“Sekumbang udah dua taun ngemujur Terpaling Makan, chukup mayuh inspirasyen diulih aku ari sida ti udah mujur.

“Cherita sida ti narit ati udah matak pengerindu aku ngambi enda mudah mantul ati enggau neruska pengawa tu.

“Semua sida ti udah teulihka pemujur tentu bisi idola tauka orang ke nyadi chunto ba pengidup sida.

“Baka nya mega aku, influencer tebilang, Khairul Aming enggau Ping Yang entara orang ti nyadi inspirasyen tauka balat marit pengerindu ba dunya content creator.

“Seduai udah nyadi inspirasyen ngagai orang bukai laban ngembuan ati ti baruh, enda putus pengarap lalu seruran ngembuan runding deka ngemansang diri enggau orang bukai.

“Enti kitai meda pejalai Khairul Aming, iya mega baka kitai, bepun ari baruh sebedau nyapai utai dikedeka ati baka diatu.

BEPUN ARI BARUH

“Khairul Aming begunaka timpuh beberapa taun sebedau bisi produk enggau chap dagang kediri empu.

“Iya ngembuan strategi matak minat penguna media sosial dulu kelebih agi Tiktok sebedau nuju strategi bukai iya nya ngelakuka produk baka Sambal Nyet enggau Dendeng Nyet Berapi.

“Taja bisi dua aja produk, tang Khairul Aming tu seikas enggau pedagang bukai lalu produk iya laku belama.

“Iya ukai terus nyadi pedagang, tang dulu nyadi content creator ngaga resipi kediri empu lalu dikerindu mensia mayuh.

“Udah nya, iya nyadi influencer lalu majak dikelala.

Ari nya, iya ngepunka singkang ngaga dua produk ti chukup laku enggau ditapat mensia mayuh.

“Kala ninga jaku, taja pen pejalai lubah tang tetap datai ba adan?

Nya mih utai ti dikemeran Khairul Aming nyentuk iya mujur diatu,” ku Chryan.

Tambah mega ku iya, Khairul Aming suah diundang bekunsi resia pemujur ba dunya pemakai, dagang enggau influencer.

Nampung kenang, iya madah ke siku da idola iya nya Ping Yang mega ngembuan strategi kediri empu lalu siku orang ti ngembuan semua chap dagang Sarawak Foodie, Borneo Foodie, Kuala Lumpur Foodie, Jakarta Foodie enggau ke bukai.

Enti dipeda ba Tiktok tu, chukup mayuh view sida ngujung ke video nya tebilang enggau mayuh mega likes.

STRATEGI

Ku Chryan, enti disebut pemakai mar kitai deka matak mensia mayuh laban nya nitih ke asai sida empu.

Ku iya, kebuah pia laban penyamai pemakai nya nitih ke siku-siku mensia lalu enti pemakai nya nyamai tentu sida deka napatka pemakai nya baru.

“Khairul Aming enggau Ping Yang tu chukup pintar laban seduai beratika dulu makit tauka chara matak ati mensia mayuh.

“Nya kebuah, pelaba aku chukup mayuh strategi dikena seduai nentuka pengawa tu mujur baka ti nyata dipeda diatu.

“Ari seduai iya, aku mayuh belajar pekara baru pasal seling dunya content creator laban ukai mudah deka ngemantupka ati mensia mayuh.

“Aku mega ngembuan pengarap dudi hari ulih sama singkang enggau sida.

“Semua podcast sida dipeda aku magang ngambi bisi pekara baru ti ulih dikemansang laban aku deka belajar chara sida berunding, baka ni sida ngepunka pengawa lalu deka nemu baka ni sida ulih mansang,” ku iya nyemetak.

Ku Chryan, pengawa iya diatu nyau lempung agi laban udah bisi tim ti ngaga video pemakai enggau review pemakai.

MANTU PEDAGANG

Nampung randau ke dalam agi, Chryan madah ke bisi tiga tuju iya ngaga content Terpaling Makan.

Keterubah nya, deka ngemuntang pengawa orang bukai kelebih agi bala pedagang ti nyual pemakai enggau mensia mayuh ti berunding dini deka makai.

“Nyadi, lebuh sida follow semua media sosial Terpaling Makan, dia sida ulih meda semua video endur makai lalu nemu nama pemakai dikedeka sida.

“Suah mega aku nerima timbal ari mensia mayuh madah ke pengudah follow Terpaling Makan, muntang agi sida ngiga endur makai ti nyamai,” terang iya.

Terang iya, kedua laban deka mantu pedagang mit baka sida aya ibu ti bejual ba sebarang alai.

“Baka ke ditemu kitai, bala sida aya ibu ti bejual ba tisi jalai udah tentu enda nemu bekenaka telefon pintar.

“Nengah pelasar Terpaling Makan tu, aku nyaup sida promosyen pemakai dijual sida lalu ulih nambah penatai pemisi sida pengudah mayuh orang datai kia.

“Laban munyi ku aku tadi, sida follower semampai nganti dini endur pemakai baru ti deka dibantai aku lalu sida deka ngelawa endur nya,” terang iya baru.

Berebak enggau nya, Chryan madah iya mega bisi peneleba ba pengawa nya laban kala mangku pengawa nyadi tuai dalam pengawa bejual enggau pekara makit sebedau tu.

Ukai naka nya aja, iya mega ngembuan mayuh pengelandik baka nemu ngadu graphic design, video editing, nyadi videographer enggau photographer kediri empu.

“Nya kebuah, manah agi ngatur semua nya ngena peneleba sereta pengelandik diri,” ku iya.

PENGELEBIH AI

Dunya content creator tu tau mai pemansang, ukai semina ngagai diri empu tang mega ngagai sektor dagang temuai menua enggau industri kreatif, ku Chryan.

“Tentu kita nyau berunding, baka ni dunya content creator tu ulih nyungkak dagang temuai?

“Saut nya mudah aja, ari video tu mih mensia mayuh deka nemu bisi pemakai nyamai ba menua kitai laban tim Terpaling Makan kala bejalai sebelah Sri Aman, Sibu enggau Kuching.

“Ba dia, kami mantaika semua pemakai nyamai ba semua endur sereta ulih matak mensia mayuh datai kia ngambi kedai pemakai nya laku.

“Kitai mega patut nemu, pelasar media sosial baka Tiktok, Facebook, Instagram enggau YouTube tu nadai sekat enggau nadai adan!

“Tu mai reti, mensia mayuh ari serata dunya pen ulih nemu pemakai nyamai ba menua kitai! Nadai ngira ba Malaysia, Brunei, Singapore, Indonesia tauka ba menua bukai.

“Nyadi content creatir tu nitih ke pemakai aplikasyen kemaya hari lalu ulih jampat ngerembai ngagai menua bukai,” ku iya.

Iya madah baru, ari nya temuai ari serata dunya deka nemuai kitu laban deka nyepi pemakai ti nyamai enggau nyelai nya.

Tambah mega, ku iya, taun baru (2026) deka nyadi Taun Nemuai Ke Malaysia lalu tu mih peluang kitai naka ulih ngelaku bemacham penyelai di Malaysia kelebih agi Tanah Kenyalang.

Kebuah kedua nya ulih nyungkak ekonomi laban dikira ari peratus tauka penyampau temuai ke datai kitu.

“Lebuh kedai makai nya ditemu nyamai, tentu temuai beguai kia laban deka nyepi pemakai pemakai nya lalu tu deka nambah penatai pemisi pengempu kedai makai nya.

“Kebuah ketiga nya ngemansang industri kreatif.

Kemaya hari diatu, mayuh endar aplikasyen tauka software ti manah dikena kami ngadu sebarang pengawa baka videographer enggau photographer.

“Aplikasyen tu deka ngemuntang pengawa ngedit. Anang enda ingat, dunya diatu nyau nuju Artificial Intellegence (AI).

“Semua kitai patut belajar ngambi ulih ngemansangka diri dalam pemansang industri kreatif.

“Keempat, ngelaku produk lokal.

Mensia mayuh deka ngelala produk nyelai dikembuan menua kitai nengah media sosial lalu kami mih ti nyaup ngelaku produk nya,” terang iya silik agi.

Nya alai, Chryan nyemetak madah ke dunya content creator tu endang ngembuan mayuh pengelebih enti dikena nuju jalai ti betul.

Ku iya, dunya content creator entara pengawa ti jampat ngerembai laban bisi AI ti ngemuntang genap pengawa kitai.