KUCHING: Pemujur jaguh gumpal isi menua ke mega ex-Pegawai Soldadu Langit Diraja Malaysia (TUDM) Buda Anchah teulihka midul pirak ba Pekit Gumpal Isi Dunya Ke-12 di Taskent, Uzbekistan chukup ngemegah enggau patut nyadi teladan.
Penyulut ke dijapai peranak asal Sri Aman tu tu mega mandangka umur semina lumur enggau nadai nekul endur iya besemekih ngulihka pemujur. Pekara ke pemadu beguna iya nya ngembuan disiplin ke tinggi dalam nyapai juluk ati.
Dua pengari ari Sarawak, Buda enggau Dr Malvern Abdullah udah mujur sangkai ba Padang Bilun Antarabansa urung pukul 10:45 minit pagi lalu penatai iya diambat Menteri Muda Raban Nembiak enggau Lumba, Datuk Snowdan Lawan enggau bala pemesai ke bukai.
Snowdan maya dirandau pemberita madah diri berasai temegah ati enggau pemujur atlit gumpal isi Malaysia tu laban ke udah mai pulai empat buah midul pirak.
Siti midul diulih Dr Malvern ba kategori 60 kilogram, lalu tiga buah midul agi diulih Buda ba kategori Master ( umur 40 – 49 taun ), kategori atas 70 kilogram enggau mega kategori beraban begulai enggau siku atlit gumpal isu indu ari Sabah, Meilaura Dora Jimmy.
Kelimpah ari nya ku iya bepekit tauka besemekih enggau atlit ari menua luar ukai pekara ke mudah ketebal agi lebuh dunya diatu agi napi pandemik COVID-19 tang taja pia ku iya Buda enggau bakih iya enda ngemuntanka pengarap rayat Malaysia, tebal agi menua Sarawak.
Nangkan ke nya, Snowdan ngarapka pekara tu ulih nyadika chuan teladan nembiak rebak baru ngambika ulih nyambung pemujur Buda Anchah ba main mandangka pemanah gumpal isi
“Tentu baka selama genap iti midul ke diulih deka meri penguntung tauka insentif ke deka diberi perintah nengeri Sarawak lalu pekara tu deka dipadahka menteri kami empu”, ku iya.
