Pemungkal Iban nemu ngaga rumah ba cherita pengingat tuai

Nitih pengingat tuai, maya agi jeman Iban betuaika Bejie Nangga Ari Patah Titi Jamban Penjuang kelia munya, kitai endang sigi nadai rumah entap endur diau baka ke maya hari tu.
Bejie enggau raban nembiak redak iya diau dalam babas sereta ngenduh sebelah lubang batu.
Batang pengidup enggau pendiau sida bepanggai ba pengawa begigaka pemakai sebelah babas, dalam kampung puang enggau sebelah sungai ti bisi besemak menua ke endur sida diau.
Sida mega agi bedau ngembuan rurun pengawa betanam betupi sereta nadai pendiau ti tetap baka pengidup ke diatu.
PENGARAP

NGIDUPKA DIRI… Bada nyadi tuai nguluka bala iya ngemeranka pengawa bansa kitai iya nya ngasu, berikan enggau begigaka utai bukai dikena ngidupka bansa diri. -Gambar Pengias

Nyadi bansa bukai ke diau di ili menua sida Bejie tu, endang mansang agi ari bansa kitai.
Kebuah pia laban sida iya bisi agi pelajar enggau penemu kena nusun pendiau diri ke berurun agi.
Penemu tu dibai bansa bukai ke bisi nampil pendiau sida, baka bansa Arab, Minangkabau, Sumatra enggau bansa Jawa.
Pendiau sida tu udah bisi pengentap sereta berurun ba pengawa betanam betupi enggau pengawa bedagang, belelang sebelah pulau Borneo, Jawa, Sumatra enggau tanah besai di Malaya.
Sida mega balat bendar ngerembaika pengarap sida sebelah rantau tu, lebih agi ungkup pengarap Islam.
RUMAH LAMA… Rumah panjai Skirau Skirau Ai, Lingga. Gambar Album

Kebuah sida baka nya laban deka ngerembaika kuasa perintah bansa sida ngagai bansa orang bukai, nyengkaum bansa Dayak ke diau ba pulau Borneo tu.
Ari nya tadi sida andalka diri tau bekuasa megai menua enggau pengeraja menua tu.
Lalu pengawa baka tu endang dipupuk sida ari serak siti ngagai serak siti, nyentuk diatu.
Pengarap bukai, baka pengarap Hindu enggau pengarap Buddha ke dulu betapak di rantau tu kelia pan berengkah bepechah ngagai sebelah tisau menua nyengkaum pulau Borneo enggau pulau Bali.
Bala kerabat Raja ke enggai masuk pengarap baru nya lalu pindah ngagai menua bukai, baka sida Raja Durong enggau Orang Panggau-Gelong.
BESERAKUP… Peranak rumah panjai besaup gawa nirika tiang rumah.

Sida lalu mai pengarap enggau penemu dikembuan sida ngagai bansa kitai Iban maya nya.
Nya kebuah ba pengawa Gawai, leka jaku, atur pendiau enggau pangkat kitai Iban baka Pateh, Temenggong, Penghulu enggau ke bukai bisi sebaka enggau orang ke megai pengarap Hindu tauka sebaka enggau leka jaku sereta pangkat ti dikena bansa Minangkabau.
NGIGA PENGIDUP
Pengawa Gawai ke endang sebaka enggau sida tu iya nya pengawa miring enggau pengawa nirika tiang chandi tauka kelingkang lebuh kitai ngereja pengawa Gawai Burong.
Lebuh tuai kitai Bejie enggau bala tuai bukai baum deka ngaga tangga dikena niki ke langit dikena betemu enggau petara ke nguasa pengarap Islam.
CHUKUP TEGAP… Gaya tiang rumah panjai ke udah tembu didiri.

Dia Bejie ngasoh menyadi iya benama Bada nyadi ke tuai nyaga sereta ngiring bansa kitai Iban.
Bada lalu nyadi tuai nguluka bala iya ngemeranka pengawa ngasu, berikan enggau begigaka utai bukai dikena ngidupka bansa diri.
Maya nya, kitai Iban diau enggau likun lalu nadai bemunsuh enggau bansa bukai, laban tubuh endang enda mayuh lalu menua pan agi puang sereta lantang endur ngidupka diri.
Nyadi sekali, lebuh Bada enggau anembiak iya pulai ngasu, hari balat bendar ujan.
Meda ujan ngemalat nya, sida lalu mampat daun kayu dikena ngelindung diri ari tinggang ujan ba rantu jalai.
NALI ADAT… Sebedau ngentak rumah, kitai mesti beratika dulu adat berumah baka diajar Raja Semarugah ngambi pengawa nadai menawa.

Datai sida dalam lubang batu endur sida diau, dia menyadi sida ke indu tak tekenyit meda sida ke pulai ngelaban ujan nya tadi enda basah.
Bada lalu madahka sida iya belindung baruh daun kayu, nya kebuah sida iya enda basah laban ujan.
Bechuanka nya tadi, kitai Iban lalu nemu mampat daun dikena belindungka ujan tauka panas ke lalu dikumbai sida dunju.
Udah ngasaika penyamai ngenduhka ujan enggau panas baruh dunju, nya baru sida nemu ngaga langkau ke tau alai diau, beatapka daun rangkai.
Berengkah ari nya, kitai Iban lalu nemu begiga enggau mindah jauh agi ari lubang batu ke alai kitai diau lalu ngujungka kitai lalu badu agi diau dalam lubang batu.
Udah sida ngasaika penyamai diau ba langkau nyembuah-nyembuah, runding sida pan mansang ari ke udah.
Sida iya pan nyau nemu begagaka dampa ke endur sida tau diau begulai mayuh enggau pangan diri, lebih agi sida ke enggai jauh ari diri sebilik bekunsi makai, bekunsi jalai ngidupka diri.
Laban dampa nya mit, lalu tubuh pan nyau mansang mayuh, sida ke diau dia pan berasai sekut.
Ari nya tadi sida lalu nemu ngaga penaik enggau buka dampa nya besai agi, ke dikumbai sida iya rumah.
ADAT BERUMAH
Lebuh sida baru berumah, udah sida tembu ngentakka tiang rumah, pagi hari siti lebuh sida deka nampung pengawa, dia sida meda semua tiang ke udah didirika sida dulu ari nya rebah magang.
Meda utai bakanya, sida alit bendar ati, nya alai sida lalu ngentakka tiang nya baru.
Pagi siti, lebuh sida napatka pengawa sida dia baru, peda sida tak udah rebah magang ga tiang rumah nya tadi.
Tiga hari sida beturut ngentakka tiang nya, tang tiang sida rebah berari-ari.
Ari siti sida lalu ngentakka tiang nya dalam agi. Pagi siti lebuh sida ngabas tiang sida dia, peda sida tak tengelam magang tiang sida nya tadi.
Semina mimit aja agi dipeda bekachuit pansut ari tanah. Lebuh sida Bada agi berundingka utai ti nyelai baka nya, alai anak temuai siku bisi datai ari kampung lalu bejalai nuju sida dia.
Iya lalu nanyaka pengawa sida ke begempuru dia. Bada lalu madahka diri deka berumah, tang lalu enda nyadi.
“Enti enda rebah, tengelam ga tiang dientakka kami,” ku saut Bada.
“Kati alai baka nya, iya katika adat dikena kita berumah?” ku tanya anak temuai.
Bada lalu madahka diri nadai adat dikena berumah, laban endang enda kala ngereja pengawa nya ngelama tu.
“Patut pengawa kita enda nyadi, laban kita nadai atur, nadai adat dikena ngereja utai,” ku anak temuai.
Ninga jaku temuai munyi nya, Bada lalu minta ajar anak temuai adat kena berumah, awakka tau ke chuan sida kedudi hari ila.
Anak temuai nya pan lalu bejaku madahka tanah nya bisi orang empu.
Enti mensia bisi pengawa ba tanah nya, sida enda tau enda meri tasih ngagai petara ke empu tanah, iya nya Raja Semarugah, mentua Raja Sempulang Gana.
Bada lalu nanyaka jalai meri tasih tanah nya, laban Raja Semarugah enda nyengala, enda nyerupa dipeda enggau mata.
Ninga tanya Bada munyi nya, anak temuai nya tadi lalu ngajar Bada munyi tu:
Kejang kita deka berumah, genap iku tuai bilik enda tau enda dulu ngerembang.
Tuai ke diatur dulu ngentak enda tau enda ngiga tambak burung nendak kanan lima iti enggau tambak nendak kiba tiga iti.
Iya kelima iti nya untung orang ke lelaki lalu iya ke tiga iti nya untung sida ke indu.
Paung burung tu enda tau enda dianjung ngagai tanah ke deka endur ngerembang, lalu engkahka ba senentang bilik orang ke dulu ngentak.
Kejang deka ngentak, indu enda tau enda dulu ngaga enggau nyendiaka perengka piring.
Kejang deka ngelubangka tiang pemun, jani tauka manuk enda tau enda dibunuh. Darah iya dikena ngenselan tiang enggau lubang nya.
Batu kuai enggau repik besi enda tau enda dibuai ke dalam lubang tiang pemun.
Udah tiang dientak, pating mumban uja ka ba pun tiang nya.
Udah anak temuai ngaraka adat, nya baru iya madahka piring enggau darah jani tauka manuk nya jadika tasih tanah diberi ngagai Raja Semarugah ngena sampi.
Nyadi repik besi, batu kuai enggau pating mumban nya laban sida nya enda rarat tabanka ai baah, ngayuka penegut enggau pengukuh rumah nya.
Enti ngentakka tiang, enda tau enda dulu berengkah ba endur ke alai ngengkah tambak burung nya tadi.
Nyadi tambak burung nya tadi disimpan dalam buluh lalu diengkah ke dalam dunju mit, udah nya dibagi ngagai genap pintu orang ke ngentak dia.
Pia mega orang ke dulu ngentak nya nitihka pun ramu. Udah abis orang ke pun ramu ngentak, nya baru orang ke ari ujung ramu sepiak tau ngentakka tiang sida.
Udah abis jaku anak temuai nya ngajar sida Bada adat dikena berumah, iya madahka diri deka pulai.
Iya lalu madahka nama diri Puntang Raga, ke datai ngajar sida ari asuh Raja Semarugah. Udah nya iya lalu lesap.