“Diatu baru kitai nemu baka ni prinsip politik iya (Dr Jerip).”
KUCHING: Pemutus Datuk Dr Jerip Susil pansut ari Parti Sarawak Bersatu (PSB) ngasuh semua bala bakih iya tekenyit.
Semua sida madah enda nemu pasal pekara nya, tambah mega nadai dipadahka ari mulut Dr. Jerip empu.
Sekretari Besai PSB George Lo endang nadai nyangka pemutus Sapit Presiden sida nya.
Ku iya, nya endang luar ari disadang parti nyengkaum iya empu enggau Presiden PSB, Dato Sri Wong Soon Koh endang nadai nemu.
“Iya (Jerip) nadai madah ngagai kami. Aku baru aja nemu,” ku iya maya dirandau kemari.
Pia mega Pemesai Khas ngagai Menteri Muda Perengka Pengangkut nya, Keron Mapus, madah enda ulih nentuka sekalika surat pemutus Dr. Jerip nya amat tauka enda.
Iya madah enda kala nulis surat nya sereta langsung enda nemu pasal nya.
“Selalu iya surat Datuk (Jerip) aku ti ngaga sekalika bekaul pengawa opis tauka pekara bukai tang surat tu ukai digaga aku.
“Nyangka iya empu nulis tauka orang bukai,” ku iya maya dirandau kemari.
Nangka nya, Ketuai Nembiak PSB Dr. Johnical Rayong Ngipa madah diri asa sereta sinu bekaul enggau pemutus Dr. Jerip.
“Aku endang asa sereta sini ninga berita ke baru nuntung parti.
“Diatu baru kitai nemu baka ni prinsip politik iya (Dr Jerip),” ku iya.
Tandu Dr Rayong, iya (Jerip) enti nitih patut bebasaka sempekat ke udah digaga 26 Jun tu tadi.
PSB udah ngaga siti sempekat ke disain Presiden iya, Datuk Sri Wong Soon Koh, Mandal Presiden Kanan, Datuk Tiong Thai King, Datuk Ranum Mina, Kaban Parlimen Sri Aman, Masir Kujat nyengkaum Jerip enggau Rayong.
Bepelasarka surat rasmi opis Dun Mambong kena 10 Julai ke disain Dr Jerip empu, iya madah diri pansut ari PSB tekalanya.
Ku iya pemutus nya digaga pengudah berandau enggau rayat sereta penyukung ba konstituensi iya.
“Tu endang pemutus ke berat ba aku. Tang iya digaga laban aku nemu semina Gabungan Parti Sarawak (GPS) dibaruh iring Kepala Menteri Datuk Patinggi Abang Johari Tun Openg ngembuan visyen, pengeransing sereta program ke ulih mai pemansang ke lebih manah ngagai sitak menua pesisir,” ku iya.
