Pemutus enda nitih PKPB engkeman ke pemaik rayat Sarawak

SIBU: Menteri Muda Pekara Pelajar, Sains enggau Pansik Teknologi, Dr Annuar Rapaee muji pemutus Perintah Sarawak enda bejalaika Atur Tagang Pejalai Besyarat (PKPB) kena 4 Mei tu endang pemutus ti engkeman nentuka rayat nengeri tu semampai bejaga ketegal pengerekai igi penyakit Covid-19.

Ku iya, PKPB tu ulih ngasuh mensia mayuh enda beratka penusah ke nyadi tauka ngasaika diri tau bejalai kin kia.

Menteri Muda Kaunsil Kandang Menua enggau Pengawa Berumah mega nangkan semua kitai, virus Covid-19 tu apin punas.

“Penerang dibantaika Menteri Besai Tan Sri Muhyiddin Yassin pasal PKPB kena 1 Mei tu tadi nerima mayuh timbal ari mensia mayuh.

“Mayuh enda setujuka atur enda diterit lebuh igi penyakit Covid-19 agi aktif ngerampit rayat ba menua tu,” ku iya nerang ditu, tadi.

Dr Annuar mega madah, iya bisi mai rayat milih sekalika setuju tauka enda pasal PKPB nya nengah akaun media rama iya.

“Bisi 87 peratus ari 4,300 responden enda setujuka PKPB tu seraya semina 13 peratus aja nyukung PKPB nya.

“Taja kitai udah ngelandaika graf kes baru enggau mega kes aktif nya berita manah ungkup raban gawa diluan tang, pengelandai nya bedau chukup lalu kitai deka meda kes nya majak nurun.

“Nya kebuah, pemutus Perintah Sarawak enda bejalaika PKPB taja sektor ekonomi nurun, mayuh peranak Sarawak ngasaika pengerai enggau pengelikun patut dijaga ari sektor nya, ku Kaban Kunsil Nengeri (Adun) Nangka nya.