KUCHING: Renggat kepenudi milih Taman Negara Niah nyadi Taba Pesaka Dunya Gerempung Pelajar, Sains enggau Main Asal Gerempung Bansa Beserakup (UNESCO) deka diatur ba New Delhi, India ba bulan Julai taun tu.

Sapit Menteri Perambu Mengeri, Atur Tanah enggau Rampa Menua, Datuk Len Talif Salleh madah, New Delhi nyadi palan milih kepenudi ti mungkur 50 menua ari serata dunya.

“Pengawa milih renggat kepenudi tu deka nentu Taman Negara Niah dipasuk ba rintai taba pesaka dunya UNESCO.

“Kitai enda meri jamin tang bepelasarka pengerembai ti dipeda enggau atur ti diambi deka meri pengulih ngagai taman negara tu dirintai nyadi taba pesaka nya.

“Insya Allah, udah tentu tu deka meri penampak ngagai pengawa ngaku ba renggat dunya tu,” ku iya.

Len Talif mansutka jaku nya rambau dirandau pemberita pengudah Pengerami Ngelalu Pengabang Hari Raya Aidilfitri ba Demak Jaya ditu, sehari tu.

Iya madah, pengawa nganjung taman negara nya dichalun ba Paris nya nyadi singkang kedua kepenudi.

Terang iya, aum tumu komiti eksekutif ti diatur ba Paris nya dipasuk 50 menua UNESCO.

Dulu agi ari nya, media ngeripot Taman Negara Niah disadang diaku nyadi Taba Pesaka Dunya UNESCO sebedau ujung taun tu.