KUCHING: Penembu lampu trafik pintar baru Kampung Semeba, Batu Kitang deka ngelancharka pejalai trafik enggau ngurangka penusah bebadi jalai alun ba genturung nya.
Adun Batu Kitang Lo Khere Chiang madahka lampu trafik pintar entara lebih 40 projek ba baruh Program Transformasyen Menua Pesisit (RTP) ba menua nya.
“Lampu trafik nya disikap enggau CCTV sereta dipatau Opis Kereja Raya (JKR) 24 jam lalu enti bisi ulah ti nyelai ditemu ba genturung nya, nya mega deka kena rikod.
“Nya alai piak ke bekaul nya patut berunding dua kali sebedau sida enchuri tauka ngereja ulah enda menuku ditu,” ku iya.
Khere Chiang madah munyi nya ba pengawa bejadika lampu trafik pintar Kampung Semeba di Jalai Stephen Yong ditu, tadi.
Nangkan nya ku iya, ba baruh Majlis Perbandaran Padawan, lebih 279 projek beungkus nyauka RM250 juta udah sereta deka dipejalaika dalam timpuh setaun.
“Mayuh projek ke dipinta bala mensia mayuh ba genturung pendiau tu lalu projek tu enda ngetu naka projek ngaga lampu trafik aja,” ku iya.
Khere Chiang mega madah sida deka terus mantu komuniti ba genturung nya kelebih agi sitak dipegai iya.
“Kitai rayat menua Sarawak lalu kitai patut ngemeratka rayat Sarawak dulu,” ku iya nerang.
Berebak enggau nya, Sapit Engineer JKR Bagi Menua Kuching Bong Yan Phing madahka projek lampu trafik nya dibelanja penuh Perintah Sarawak enggau ungkus RM278,500.
“Semua projek tu manggai RM650,000 nyengkaum pengawa melakin enggau muka lorong baru ba Jalai Stephen Yong tama ngagai Kampung Semeba,” ku iya.
