JULAU: Rebak biak Sarawak dipinta nyikap diri ngena penemu enggau pengelandik ti relevan dikena napi ubah landskap ekonomi lalu nentuka sida ulih besemekih ba makit kereja global.
Menteri Pelajar, Inovasyen enggau Pemansang Penau Sarawak, Datuk Seri Roland Sagah Wee Inn madah, pengawa nguasa bidang Sains, Matematik enggau jaku English meseti dikemerat laban ketetiga bidang nya nyadi pugu pemansang teknologi enggau industri dudi hari.
Ku iya, Sarawak diatu benung deras mansang nuju pemansang ekonomi bepuguka inovasyen, nyengkaum sektor hidrogen, ekonomi digital sereta sains enggau teknologi ti begunaka pengereja landik.
“Anang nyekat juluk deka mujur semina di Sarawak tauka Malaysia. Rebut mih peluang ba dini-dini endur aja, tambah mayuh agi peneleba lalu bai pulai pengelandik nya ngemansang nengeri tu enti udah datai maya,” ku iya. Sagah madah munyi nya ngagai pemberita pengudah ngatur pejalai ngabas khas ngagai Sekula Primari (SK) Nanga Meluan, ditu Hari Enam tu tadi.
Iya mega minta nembiak anang takut belajar Matematik, Sains enggau jaku English laban pengawa nguasa bidang nya deka nyendia mayuh peluang kereja baka injiniring, teknologi enggau Sains.
Ku iya, inisiatif pelajar pechuma ti dipejalai Perintah Sarawak mega ngemerat bidang pelajar ti bisi peminta tinggi nyengkaum injiniring, teknikal, perubat, undang-undang, pekara wang enggau perakaunan dikena nempa modal mensia bekualiti ti ulih tetangkupka peminta pemansang nengeri.
Berebak enggau nya, ku iya, bidang psikologi mega meseti diperati berindik ari isu pengerai runding majak nyadi pemar ba pengidup moden lalu begunaka mayuh pakar. – EDISI UKAS
