BINTULU: Kongres Betanam Betupi Meruan enggau Pengelikun Bekal Pemakai Ke-3 (COSAFS) 2026 nyadi pelasar beguna dikena ngempuru raban pemansik, penempa polisi, pemekuh industri, pedagang enggau nembiak ari menua tu enggau menua luar ngambi ngiga chara inovatif ngagai pemar jamin pengelikun bekal pemakai dunya.
Menteri Industri Pemakai, Komoditi enggau Pemansang Kandang Menua Sarawak, Datuk Seri Dr Stephen Rundi Utom madah, pengawa ngatur kongres nya setipak enggau pekara ti diguna dunya diatu ti benung betapi enggau pemar kompleks nyengkaum ubah gaya hari, penyampau tubuh peranak nambah, penanggul suntuk pemansut sereta keruga sistem pemakai.
“COSAFS 2026 nyendia ruang strategik endur bekunsi penemu, besilih chara pemadu manah sereta nempa kaul kerejasama entara mayuh bengkah raban dalam pengawa ngenegapka sistem pemakai ti meruan sereta tan agi.
“Randau ti diatur sepanjai kongres tu ukai semina nambah penemu saintifik, tang mega ngemujur pemansang polisi ti manah agi, industri entap agi sereta sistem pemakai ti tan agi ungkup dudi hari,” ku iya.
Rundi bejaku munyi nya rambau COSAFS 2026 ti dipenyadi Premier Sarawak, Datuk Patinggi Tan Sri Abang Johari Tun Openg ba siti hotel ditu, ensanus.
Ku iya, pengawa ngaul penyereta antarabansa ba kongres tu ngayanka pengeran begulai enggau komuniti global mutar isu jamin pengelikun bekal pemakai nengah sains, inovasyen enggau kerejasama ngilah menua.
Iya madah, pengawa nentuka bekal pemakai chukup sereta meruan begunaka chara ti begempung ti nyerangkung pansik akademik enggau peminta industri sereta mensia mayuh.
Nya kebuah, ku iya, palan pelajar tinggi baka UPM bejalaika tanggungpengawa ti beguna amat dikena ngasilka pansik enggau teknologi baru ti ulih dikalih nyadi chara praktikal nambah produktiviti betanam betupi sereta negap rentayan pemakai.
“Kerejasama entara perintah, universiti, industri enggau komuniti beguna amat nentuka asil pansik meri penguntung ti nyengala ngagai mensia mayuh,” terang iya.
Ba konteks Sarawak, iya madah ke perintah nengeri terus ngemeratka ngemansang sektor agropemakai chara moden ngena teknologi, inovasyen, komersialisasyen enggau pengawa betanam betupi ti meruan dikena nyukung juluk nyadi pengeksport beresi pemakai manggai taun 2030.
Iya mega ngemeratka pemesai guna inisiatif baka AgriHub sereta mega pemansang pengelandik nengah Sekula Sains Veterinar enggau Jelu (SVAS) ba pengawa nambah produktiviti betanam betupi, pengerai jelu tupi, pengelikun bekal pemakai enggau biosekuriti nengeri.






