SARIKEI: Arus penyambung ti enda deras ba Pakan patut dikenati kelebih agi lebuh perintah deka ngemansang teknologi digital ba menua tu.
Kaban Kunsil Nengeri (Adun) N.47 Pakan, Tan Sri William Mawan Ikom madah, arus penyambung ti enda deras ba Pakan nya penanggul besai ti dibantai ba licha pemansang digulu Kepala Ketua Menteri Datuk Patinggi Abang Johari Tun Openg.
Ku iya, arus penyambung ti deras ukai semina meri pemaik besai tang deka meri peluang ngagai peranak nyungkak ekonomi nengah teknologi digital.
“Sitak tu tebilang nyadi pemansut asil betanam betupi nyengkaum lada chelum enggau lada burak pemadu besai enggau bisi kualiti tinggi ba Malaysia.
“Nya alai, pengawa ngena teknologi baru tu nyerungkai pengulih betanam betupi dandang besai ba sitak nya,” ku Mawan.
Mawan mansutka jaku nya lebuh Pengawa Bejadi Jalai Pakan-Jalai Ulu Kota di Pakan.
Terang iya, Perintah Gempung Parti Sarawak (GPS) Sarawak dipegai Kepala Menteri Abang Johari Tun Openg seruran beratika peminta rayat menua pesisir.
Mawan madah, Perintah GPS enda kala nejuka peminta rayat kelebih agi ba sitak menua ulu enggau menua pesisir.
“Pekara tu ulih dibantai nengah inisiatif pemansang dipejalai ba sitak tu.
“Seharitu (kemari), peranak ditu deka ngasaika pemaik besai ari Projek Jalai Ulu Kota –Pakan Renggat Kedua tu,” ku iya.
