KUCHING: Serikat penerebai tambang murah, AirAsia deka nyendiaka mayuh penerebai tambah ke Sarawak ungkup timpuh seminggu sebedau enggau pengudah Pengerami Hari Raya Aidilfitri.
Pegawai Pekara Sarawak AirAsia Berhad, Hamdan Mohamad madah, penerebai nya deka disedia nyentuk tengah malam.
“Tu mungkur penerebai entara Kuala Lumpur tauka Johor Bahru ke Kuching, Sibu enggau Miri,” ku iya.
Hamdan nibar jaku nya lebuh dirandau pemberita pengudah Iftar AirAsia Begulai enggau Pemberita di Hilton Hotel, malam kemari.
Ku Hamdan, taja udah ba timpuh semak tang engka agi bisi tikit bilun ulih dibeli enggau rega ti patut.
“Kitai mega bisi tikit bilun ungkup tengah malam. Enti bisi tetemuka tikit bilun berega RM199, anang enda meli ngambi ulih pulai ke menua tauka pulai ngagai endur gawa,” ku iya.
Nambah ke nya, iya ngelalau bala penumpang nyendiaka diri tumu kelebih agi enti bejalai maya musin pengerami.
“Enti kita mai kantung tambah, beli kantung tambah enggau lengkas lalu datai ngagai padang bilun tumu agi ngambi semua pengawa lanchar enggau nadai penanggul,” terang iya baru.
