KUCHING: Gerempung Orang Berikan Nengeri Sarawak (Penesa) enggau Gerempung Orang Berikan Kandang Menua (PNK) sedia meli ikan ti enda alah juah bala orang berikan ba Sarawak.
Menteri Muda Betanam Betupi Datuk Dr Abdul Rahman Ismail madah, sekumbang Atur Tagang Pejalai (PKP) diteritka, sida nerima ripot orang berikan ba menua tu napi penanggul nyual asil ikan sida.
“Nya kebuah, Perintah Sarawak bejalaika inisiatif bekerejasama enggau Kaunsil Pemansang Ikan Malaysia (LKIM), piak Gerempung Orang Berikan, Penesa enggau PNK ngambi sida meli ikan enda alah jual nya ari sida ti berikan tu,” terang iya.
Abdul Rahman mansutka jaku nya lebuh dirandau pemberita ngabas Pasar Orang Berikan Vista Tunku, Penesa ba Petra Jaya, ditu ensanus.
Terang iya, nengah chara tu piak Penesa enggau PNK ulih nyual baru ikan nya enggau orang berikan bisi belanja.
“Perintah Sarawak mega udah nyendiaka agih belanja khas baka subsidi ngagai Penesa enggau PNK.
“Bisi 18 PNK ba selampur Sarawak udah nerima agih belanja RM30,000 seraya Penesa udah nerima RM60,000 ke alai semua agih belanja nya penyampau RM600,000,” tandu iya.
Ku Abdul Rahman, program nya lanchar dipejalai ke alai orang berikan udah nyual asil ikan sida.
“Orang berikan ukai semina diasuh nyual asil ikan ngagai PNK tauka Penesa aja, tang sida mega ulih nyual ngagai mensia mayuh.
“Taja pia, enti sema asil ikan enda alah jual, Penesa enggau PNK deka meli asil ikan sida enggau mayuh orang berikan udah nyual ngagai dua piak tu,” terang Abdul Rahman.
